ពិធីសម្ពោធវិមានឈ្នះឈ្នះនឹងមានអុជកាំជ្រួច 3D ដ៏ទំនើបមិនធ្លាប់មាននៅកម្ពុជា
សារព័ត៌មាន Cambodia News/
រាជធានីភ្នំពេញ (២៧ ធ្នូ ២០១៨) ៖ ក្នុងឱកាសចុះត្រួតពិនិត្យការរៀបចំពិធីសម្ពោធវិមានឈ្នះឈ្នះ កាលពីព្រឹកថ្ងៃទី២៦ ខែធ្នូ ឆ្នាំ២០១៨ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ បានបញ្ជាក់ថា ក្នុងពិធីសម្ពោធវិមានឈ្នះឈ្នះរយៈពេល៣យប់ ចាប់ពីយប់ថ្ងៃទី២៩ ដល់ ៣១ ខែធ្នូ ឆ្នាំ២០១៨ខាងមុខនេះ ក្រុមការងារជំនាញ បានត្រៀមរួចជាស្រេចហើយ ក្នុងការរៀបចំបច្ចេកទេសអុជកាំជ្រួចជាច្រើនពាន់គ្រាប់។ ក្នុងនោះកាំជ្រួចដែលត្រូវអុជ គឺជាប្រភេទកាំជ្រួច 3D មានលក្ខណៈទំនើបប្លែកជាងកំាជ្រួចនានាដែលបានបាញ់នៅកម្ពុជាកន្លងមក។
សម្តេចបន្តថា កាំជ្រួចដែលត្រូវអុជក្នុងព្រឹត្តិការណ៍សម្ពោធវិមានឈ្នះឈ្នះទំាង៣យប់នោះ គឺជាកំាជ្រួចដែលមានលក្ខណៈទំនើបអស្ចារ្យ មានរូបភាពប្លែកៗ ដែលបង្ហាញពីប្រទេសជាតិមានសុខសន្តិភាព និងការអភិវឌ្ឍ ក្រោមការដឹកនាំរបស់សម្តេច ហ៊ុន សែន។ សម្តេចបន្ថែមថា ទន្ទឹមនឹងការអុជកាំជ្រួច 3D នាពេលរាត្រីទំាង៣ថ្ងៃនេះ មានការសម្តែងសិល្បៈបុរាណសម័យដែលមានការចូលរួមពីកំពូល តារាចម្រៀងល្បីៗប្រចាំកម្ពុជា ដើម្បីបង្កលក្ខណៈសប្បាយរីករាយជូនប្រជាពលរដ្ឋដែលមកចូលរួមលេងកម្សាន្តនៅក្នុងតំបន់វិមានឈ្នះឈ្នះនេះផងដែរ។
សូមជម្រាបថា យោងតាមកម្មវិធី នៅថ្ងៃទី២៩ ខែធ្នូ ដែលជាថ្ងៃសម្ពោធវិមានឈ្នះឈ្នះ មានការអុជកាំជ្រួច 3D នាវេលាម៉ោង ៧យប់ក្នុងរយៈពេល ៤៥នាទី, នៅថ្ងៃទី៣០ ខែធ្នូ អុជកាំជ្រួចរយៈពេល ៣០នាទី និងនៅថ្ងៃទី៣១ ខែធ្នូ ដែលជាថ្ងៃឆ្លងឆ្នាំសកលនៅវេលាម៉ោង ១២អាធ្រាត អុជកាំជ្រួចរយៈពេលមួយម៉ោងពេញ៕
