សម្តេចតេជោ ៖ បងប្អូនជាមហាគ្រួសារតែមួយរបស់កម្ពុជាទោះបីរស់នៅទីណាក៏ដោយ
សារព័ត៌មាន Cambodia News/
រាជធានីភ្នំពេញ (២៦ កញ្ញា ២០១៨) ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានសរសេរលើ Facebook នៅថ្ងៃនេះ ដោយបញ្ជាក់ថា ៖ នៅថ្ងៃព្រហស្បត្ត៍ទី ២៧ កញ្ញា ខាងមុខនេះ ខ្ញុំនឹងដឹកនាំ គណប្រតិភូជាន់ខ្ពស់កម្ពុជាទៅចូលរួមកិច្ចប្រជុំទូទៅលើកទី៧៣ នៃមហាសន្និបាតអង្គការ សហប្រជាជាតិ (UN) ដែលកម្ពុជាមានតួនាទីដ៏សំខាន់ជាអនុប្រធាននៃមហាសន្និបាត (Vice President of the 73rd Session of the UN General Assembly 2018-2019) នៅទីក្រុងញ៉ូវយ៉ក សហរដ្ឋអាមេរិក (New York, USA)។
សម្តេចបានបញ្ជាក់ថា ក្នុងពេលស្នាក់នៅទីនោះខ្ញុំនឹងឆ្លៀតពេលជួបសំណេះសំណាលសួរសុខទុក្ខបងប្អូនប្រជាពលរដ្ឋខ្មែរ-អាមេរិកាំងដែលកំពុងរស់នៅក្នុងសហរដ្ឋអាមេរិកផងដែរ។ ទោះបីរស់នៅទីណាក៏ដោយ គឺបងប្អូនជាមហាគ្រួសារខ្មែរតែមួយរបស់កម្ពុជា។
ខ្ញុំសូមផ្តាំផ្ញើសួរសុខទុក្ខបងប្អូនខ្មែរ-អាមេរិកាំងនៅគ្រប់រដ្ឋទាំងអស់ និងសូមអរគុណក្មួយៗ និងបងប្អូនដែលកំពុងត្រៀមខ្លួនមកទទួលស្វាគមន៍ខ្ញុំនៅពេលដ៏ខ្លីខាងមុខនេះ ៕
