កម្ពុជាហាមនាំចូល និងចែកចាយម្សៅទឹកដោះគោសម្រាប់ទារក Dumex
សារព័ត៌មាន Cambodia News/
រាជធានីភ្នំពេញ (២៩ សីហា ២០១៨) ៖ យោងតាមសេចក្តីជូនដំណឹងរបស់អគ្គនាយកដ្ឋានកាំកុងត្រូល នៃក្រសួងពាណិជ្ជកម្ម បានឲ្យដឹងថា អាជ្ញាធរកសិម្ហូបអាហារ និងបសុពេទ្យប្រទេសសិង្ហបុរី បានជូនដំណឹងអំពីការរកឃើញបាក់តេរី Cronobacter sakazakii នៅក្នុងគំរូផលិតផលម្សៅទឹកដោះគោសម្រាប់ទារក Dumex Mamil Gold Infant Milk Formula-Step1ដែលមានប្រភពដើមនៅប្រទេសម៉ាឡេស៊ី និងនាំចូលដោយក្រុមហ៊ុន Danone Dumex។
សេចក្តីជូនដំណឹងនោះក៏បានសង្កត់ធ្ងន់ថា ដើម្បីទប់ស្កាត់គ្រោះថ្នាក់ដែលអាចប៉ះពាល់ ដល់សុខភាពជាយថាហេតុ អគ្គនាយកដ្ឋានកាំកុងត្រូល សូមអំពាវនាវដល់សាធារណជន សូមកុំទិញផលិតផលដែលមានអត្តសញ្ញាណ ដូចបានជម្រាបជូនខាងលើ និងសូមជួយសហការផ្តល់ព័ត៌មានដល់មន្ត្រីមានសមត្ថកិច្ច ក្នុងករណីបងប្អូនប្រជាពលរដ្ឋបានជួបប្រទះ ៕
