រដ្ឋមន្រ្តីអប់រំ ៖ ចំនួនសិស្សប្រឡងបាក់ឌុបឆ្នាំនេះមានការកើនឡើង
សារព័ត៌មាន Cambodia News/
រាជធានីភ្នំពេញ (២០ សីហា ២០១៨) ៖ រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន បានថ្លែងថា នៅឆ្នាំនេះ ចំនួនសិស្សប្រឡងមធ្យមសិក្សាទុតិយភូមិ (បាក់ឌុប) មានការកើនឡើង គឺជាង១០ម៉ឺននាក់ និងមណ្ឌលប្រឡងកើនឡើងដល់១៩៦មណ្ឌល។ លោកថ្លែងបែបនេះ ខណៈដែលអញ្ជើញបើកវិញ្ញាសារប្រឡងមធ្យមសិក្សាទុតិយភូមិ (បាក់ឌុប) នៅមណ្ឌលប្រឡងវិទ្យាល័យព្រះស៊ីសុវត្ថិ នៅព្រឹកថ្ងៃទី២០ ខែសីហា ឆ្នាំ២០១៨នេះ។
លោកបន្ដថា នេះគឺជាឆ្នាំទី៥ហើយ ដែលក្រសួងអប់រំ យុវជន និងកីឡា រៀបចំឲ្យមានកំណែទម្រង់ការប្រឡងសញ្ញាបត្រមធ្យមសិក្សាទុតិយភូមិ ហើយលទ្ធផលល្អប្រសើរនេះបានដោយការសហការជាមួយអង្គភាពប្រឆាំងអំពើពុករលួយ និងសហភាពសហព័ន្ធយុវជនកម្ពុជា នៅក្នុងការរៀបចំការប្រឡង ក៏ដូចជាការបំប៉នសិស្សដើម្បីឲ្យគាត់ខិតខំប្រឹងប្រែងរៀនសូត្របន្ថែមទៀត។
លោករដ្ឋម្រ្តីបញ្ជាក់ថា ពីមួយឆ្នាំទៅមួយឆ្នាំ ដំណើការប្រឡងកាន់តែល្អ ហើយមិនឃើញសិស្សណាម្នាក់កាន់សំណៅឯកសារ ឬគ្រឿងអេឡិចត្រូនិកចូលមណ្ឌលប្រឡងទេ។ ហើយទាំងអនុរក្ស មេប្រយោគ បានបំពេញការងារក្នុងការទទួលខុសត្រូវទាំងអស់គ្នា។ លោកបន្ថែមទៀតថា ក្រសួងបានប្តូរមណ្ឌលប្រឡងមួយមណ្ឌលនៅខេត្តកំពត ដោយសារភ្លៀងធ្លាក់ប៉ុន្មានថ្ងៃជាប់គ្នា បណ្ដាលឲ្យទឹកលិច ហើយបានប្តូរទៅកន្លែងដែលមានសុវត្ថិភាព។
សូមជម្រាបថា ការប្រឡងសញ្ញាបត្រមធ្យមសិក្សាទុតិយភូមិប្រព្រឹត្តធ្វើឡើងនៅថ្ងៃទី២០ ខែសីហា ឆ្នាំ២០១៨នេះ គឺមានបេក្ខជនសរុប ១១៧ ០៦១នាក់ និងមានមណ្ឌលប្រឡងសរុប ១៩៥មណ្ឌល ចែកចេញជា ៤៧១៦បន្ទប់ នៅ ២៥ រាជធានី-ខេត្តទូទាំងប្រទេស។ ចំណែកការប្រកាសលទ្ធផលនៅតាមមណ្ឌលប្រឡងនីមួយៗ នារសៀលថ្ងៃទី១១ ខែកញ្ញា ឆ្នាំ២០១៨ សម្រាប់មណ្ឌលប្រឡងនៅរាជធានីភ្នំពេញ និងខេត្តកណ្តាល និងនៅថ្ងៃទី១២ ខែកញ្ញា ឆ្នាំ២០១៨ សម្រាប់មណ្ឌលប្រឡងនៅខេត្តផ្សេងៗ៕
