វិស័យធនាគារនៅកម្ពុជា នៅតែមានភាពល្អប្រសើរ
សារព័ត៌មាន Cambodia News/
រាជធានីភ្នំពេញ (៦ កក្តដា ២០១៨) ៖ ក្នុងពិធីប្រគល់សញ្ញាបត្រថ្នាក់ប្រកាសនីយបត្រជាន់ខ្ពស់បច្ចេកទេសធនាគារ កាលពីព្រឹកថ្ងៃទី៥ កក្កដា ទេសាភិបាលធនាគារជាតិនៃកម្ពុជា លោក ជា ចាន់តូ បានលើកឡើងថា សុខភាពក្នុងវិស័យធនាគារនៅកម្ពុជា នៅតែមានភាពល្អប្រសើរ ដោយទំហំទ្រព្យសកម្មបានកើនឡើងដល់ប្រមាណ៣១លានដុល្លារអាមេរិក ។
លោកថ្លែងថា ៖« ក្នុងរយៈពេល២០ឆ្នាំមកនេះ កម្ពុជាសម្រេចបានកំណើនសេដ្ឋកិច្ចក្នុងរង្វង់៧,៧% ជាមួយនឹងការរក្សាស្ថិរភាពសេដ្ឋកិច្ចបានល្អប្រសើរ ក្នុងអតិផរណាមានកម្រិតទាបអាចគ្រប់គ្រងបានជាមធ្យម៣,៥% » ។ លោកបន្ដថា ៖« ជាមួយនឹងកំណើនសេដ្ឋកិច្ច ការគ្រប់គ្រងចរន្តសាច់ប្រាក់ និងអត្រាអតិផរណាល្អប្រសើរ បានធ្វើឲ្យកម្ពុជាកាត់បន្ថយអត្រាភាពក្រីក្របានយ៉ាងឆាប់រហ័ស ពីអត្រា៥០,២%នៅឆ្នាំ២០០២ មកនៅត្រឹម១០%នៅឆ្នាំ២០១៨នេះ » ។
លោកទេសាភិបាលបានបន្ថែមថា នៅក្នុងដំណើរការអភិវឌ្ឍសេដ្ឋកិច្ចសង្គម ជាមួយទស្សនៈវែងឆ្ងាយរបស់រាជរដ្ឋាភិបាល វិស័យធនាគារបានចូលរួមចំណែកយ៉ាងសកម្ម តាមរយៈការផ្តល់សេវាហិរញ្ញវត្ថុប្រកបដោយវិសាលភាព និងបរិយាប័ន្ន ដែលបានលើកស្ទួយនូវកម្រិតជីវភាពប្រជាពលរដ្ឋ និងការកាត់បន្ថយភាពក្រីក្រនៅកម្ពុជា ដែលមកដល់បច្ចុប្បន្ននេះទ្រព្យសកម្មរបស់វិស័យធនាគារ បានកើនឡើង៧៣ដង បើធៀបនឹងចុងទសវត្សរ៍ទី៩០ ។
លោកទេសាភិបាលបញ្ជាក់ថា ៖« ការរីកចម្រើននៃបច្ចេកវិទ្យាហិរញ្ញវត្ថុ និងការកើនឡើងនៃតម្រូវការរបស់អតិថិជន បានជំរុញឱ្យគ្រឹះស្ថានធនាគារនិងហិរញ្ញវត្ថុ បាននិងកំពុងអភិវឌ្ឍន៍ បណ្តាញសាខា, ធ្វើពិពិធកម្មផលិតផលនិងសេវា, លើកកម្ពស់ប្រសិទ្ធភាព និងគុណភាពនៃប្រតិបត្តិការ និងពង្រឹងភាពរឹងមាំនៃដើមទុននិងសន្ទនីយភាព ។ ទន្ទឹមនឹងនេះ ប្រព័ន្ធទូទាត់សងប្រាក់ ក៏ត្រូវបានធ្វើទំនើបកម្មជាលំដាប់ឱ្យកាន់តែមានភាពឆាប់រហ័ស កម្រៃសមរម្យ និងសុវត្ថិភាពខ្ពស់ » ៕