ក្មេងៗថៃដែលទើបរកឃើញក្នុងរូងភ្នំថាមលួងអាចនឹងបន្តនៅទីនោះ៤ខែទៀត
សារព័ត៌មាន Cambodia News/
បាងកក ៖ បើតាមក្រុមជំនាញថៃ និងអន្តរជាតិ ដែលកំពុងបំពេញប្រតិបត្តិការនៅឡើយនៅតំបន់រូងភ្នំថាំលួង ស្រុកម៉ែសៃ នៃខេត្តឈៀងរ៉ាយ ភាគខាងជើងប្រទេសថៃនោះបានឲ្យដឹងថា យ៉ាងហោចណាស់ក៏ត្រូវប្រើរយៈពេល៤ខែទៀត ទើបអាចយកក្មេងៗទាំង១២នាក់ និងគ្រូបង្វឹកបាល់ទាត់ពួកគេម្នាក់ ចេញពីរូងភ្នំនេះបាន។ នេះបើតាមសារព័ត៌មាន south china morning post ។
ប្រធានកងទ័ពជើងទឹកថៃ លោក Anand Surawan ថា «យើងនឹងធ្វើការរៀបចំបញ្ជូនអាហារបន្ថែម ដែលត្រូវបានបន្តយ៉ាងហោចណាស់រយៈពេល៤ខែ ព្រមទាំងបង្ហាត់កីឡាករបាល់ទាត់ទាំង១៣ រូបនោះ ឲ្យចេះមុជទឹក ខណៈដែលទឹកនៅតែបន្តជន់លិចយ៉ាងខ្លាំងនៅក្នុងរូងភ្នំ»។ ប្រភពដដែលបានបញ្ជាក់ទៀតថា គ្រូពេទ្យមួយរូបត្រូវបានបញ្ជូនទៅកាន់រូងភ្នំនោះ ដើម្បីពិនិត្យសុខភាពពួកគេ។
ដោយឡែកអ្នកចាត់ចែងប្រតិបត្តិការសង្គ្រោះអាមេរិក លោក Anmar Mirza បាននិយាយថា ការសម្រេចចិត្តជាបឋមនោះ គឺគួរតែព្យាយាមជម្លៀសពួកគេចេញពីរូងភ្នំ ឬក៏ផ្គត់ផ្គង់អាហារដល់ពួកគេនៅនឹងកន្លែង។ លោក បានបន្តទៀតថា «ការផ្គត់ផ្គង់អាហារដល់ពួកគេនៅក្នុងរូងភ្នំ អាចនឹងប្រឈមមុខនឹងឧបសគ្គជាច្រើន អាស្រ័យទៅតាមការលំបាកនៃការមុជទឹក»។ លោកបន្ត «ការព្យាយាមជម្លៀសអ្នកដែលមិនចេះមុជទឹកចេញពីល្អាងភ្នំ គឺជាវិធីមួយដែលគ្រោះថ្នាក់បំផុត បើទោះបីជាការមុជទឹក មិនសូវពិបាកក្តី»។
សូមជម្រាបថា ក្មេងៗទាំង១២នាក់ ព្រមទាំងគ្រូបង្វឹករបស់ពួកគេ ត្រូវបានរកឃើញនៅក្នុងល្អាងភ្នំ ថាមលួង កាលពីយប់ថ្ងៃទី០២ កក្កដា ដោយពួកគេនៅមានជីវិតនៅឡើយ៕
