អគ្គស្នងការរងនគរបាលជាតិ បញ្ជាក់ ៖ រថយន្តតាក់ស៊ីដែលបុកព្រះទីនាំងសម្តេចក្រុមព្រះ គឺជាករណីគ្រោះថ្នាក់ចរាចរណ៍
សារព័ត៌មាន Cambodia News/
ភ្នំពេញ ៖ នៅក្នុងសន្និសិតសារព័ត៌មាន ជុំវិញករណីគ្រោះថ្នាក់ចរាចរណ៍ សម្ដេចក្រុមព្រះ នរោត្ដម រណឫទ្ធិ ព្រះប្រធានគណបក្សហ្វ៊ុនស៊ិនប៉ិច និងអ្នកម្នាង អ៊ុក ផល្លា បណ្តាលឲ្យសោយទិវង្គត់ កាលពីពេលថ្មីៗនេះ នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានបញ្ជាក់ថា គឺជាករណីគ្រោះថ្នាក់ចរាចរណ៍សុទ្ធសាធ សូមបដិសេធចំពោះព័ត៌មានដែលលើកឡើងមិនត្រឹមត្រូវ។
នាយឧត្តមសេនីយ៍ ហ៊ឹម យ៉ាន អគ្គស្នងការរងនគរបាលជាតិ បានលើកឡើងថា ផ្អែកតាមការស្រាវជ្រាវករណីគ្រោះថ្នាក់ចរាចរណ៍នេះ បង្កឡើងដោយឈ្មោះ ម៉ិល សារ៉េត អ្នកបើករថយន្តតាក់ស៊ី បានបើកបរក្នុងល្បឿនលឿន វ៉ាជែង ទៅបុកព្រះទីនាំងសម្តេចក្រុមព្រះ។ អ្នកបើកបរបានសារភាពពិតជាបានបើកបរក្នុងល្បឿនលើសកំណត់ វ៉ាជែង ក្នុងល្បឿន១០០គីឡូម៉ែត្រ ក្នុងមួយម៉ោង។
សូមបញ្ជាក់ថា ៖ សម្ដេចក្រុមព្រះ នរោត្ដម រណឬទ្ធិ ព្រះប្រធានគណបក្សហ្វ៊ុនស៊ិនប៉ិច និងអ្នកម្នាង អ៊ុក ផល្លា បានជួបគ្រោះថ្នាក់ចរាចរណ៍ កាលពីវេលាម៉ោង ៩ព្រឹកថ្ងៃទី១៧ ខែមិថុនា ឆ្នាំ២០១៨ នៅភូមិអូរតាសេក ឃុំអូរចំណារ ស្រុកព្រៃណប់ ខេត្ដព្រះសីហនុ ខណៈដែលព្រះអង្គកំពុងយាងទៅជួបសំណេះសំណាលជាមួយប្រជាពលរដ្ឋនៅក្នុងខេត្តព្រះសីហនុ។ ដោយសារតែស្ថានភាពរបួសធ្ងន់ធ្ងរពេក អ្នកម្នាង អ៊ុក ផល្លា បានសោយទិវង្គត កាលពីវេលាម៉ោងជាង ១២រសៀលថ្ងៃទី១៧ ខែមិថុនា ឆ្នាំ២០១៨ ៕
