សម្តេចតេជោ លើសន្លឹកឆ្នោតគណបក្សប្រជាជនកម្ពុជានៅខាងស្តាំដៃ ជួរទី២ លេខរៀងទី២០
សារព័ត៌មាន Cambodia News/
ភ្នំពេញ ៖ សម្តេចអគ្គមហាសេនាបតីតេជោហ៊ុនសែន ប្រធានគណបក្សប្រជាជនកម្ពុជា បានលើសន្លឹកឆ្នោតគណបក្សប្រជាជនកម្ពុជានៅខាងស្តាំដៃ,ជួរទី២,លេខរៀងទី២០ ក្រោមគេបំផុតដែលមានរូបផ្លាកសញ្ញាគណបក្សប្រជាជនកម្ពុជា (ទេវតាបាចផ្កា), ប្រអប់គូសសញ្ញាគាំទ្រ និងឈ្មោះគណបក្សប្រជាជនកម្ពុជា។
សម្តេចតេជោបានសរសេរក្នុងផេកផ្លូវការរបស់សម្តេចកាលពីថ្ងៃអាទិត្យទី៣ ខែមិថុនា ថា តាមធម្មតាមុននឹងការបោះឆ្នោតមកដល់ គឺគ្រប់គណបក្សនយោបាយទាំងអស់នឹងចូលរួមឃោសនាបោះឆ្នោត ក្រោមការត្រួតពិនិត្យរបស់ គ.ជ.ប ចាប់ពីថ្ងៃទី ៧ កក្កដា ដល់ ២៧ កក្កដា ២០១៨ ដែលមានចំនួន ២១ថ្ងៃគត់។
សម្តេចបន្តថា នៅក្នុងទម្រង់សន្លឹកឆ្នោតថ្មីជាផ្លូវការដែលបានរៀបចំដោយ គ.ជ.ប.គឺបងប្អូនអាចឃើញឈ្មោះ គណបក្សនយោបាយទាំងអស់រៀបជា២ជួរ គឺជួរខាងឆ្វេងដៃដែលមានលេខរៀងពីលេខ១-១០ និងជួរខាងស្តាំដៃដែលមានលេខរៀងពីលេខ ១១-២០។ សម្តេចបន្តថារបៀបគូសសន្លឹកឆ្នោតគឺគ.ជ.ប.បានលើកទឹកចិត្តឲ្យអ្នកបោះឆ្នោតគូសសញ្ញាធិកនៅក្នុងប្រអប់បួនជ្រុងទ្រវែង ។
សម្តេចបន្ថែមថាអរគុណបងប្អូនប្រជាពលរដ្ឋ សមាជិកសមាជិកា ក្មួយៗយុវជន និងកូនក្មួយកម្មករកម្មការនីទាំងអស់ដែលបានបោះឆ្នោតគាំទ្រគណបក្សប្រជា ជនគ្រប់ៗអាណត្តិកន្លងមកនេះ និងនៅថ្ងៃទី ២៩ កក្កដា ២០១៨ ខាងមុខនេះ៕ ដោយ ៖ សារព័ត៌មាន Cambodia News
