សម្ដេចតេជោ ហ៊ុន សែន ៖ ការបោះឆ្នោតបានកំណត់រួចហើយ មិនមានអ្វីផ្លាស់ប្តូរនោះទេ
សារព័ត៌មាន Cambodia News/
ភ្នំពេញ (១៨ មករា ២០១៨) ៖ ក្នុងឱកាសអញ្ជើញប្រកាស ផ្សព្វផ្សាយគោលនយោបាយជាតិ ស្តីពី មនុស្សវ័យចាស់ ឆ្នាំ២០១៧-២០៣០ នៅព្រឹកថ្ងៃទី១៨ ខែមករា នេះ សម្ដេចតេជោ ហ៊ុន សែន នាយករដ្ឋមន្រ្តី នៃកម្ពុជា បានបញ្ជាក់ថា តាមរដ្ឋធម្មនុញ្ញកម្ពុជា នាយករដ្ឋមន្រ្តីគ្មានសិទ្ធិលើកពេល ឬពន្យាពេលការបោះឆ្នោតទេ ដូច្នេះការបោះឆ្នោតជ្រើសរើស សមាជិកព្រឹទ្ធសភា និងការបោះឆ្នោតជ្រើស សមាជិករដ្ឋសភា ដែលបានកំណត់រួចហើយ មិនមានអ្វីផ្លាស់ប្តូរនោះទេ។
សម្ដេចតេជោ ហ៊ុន សែន បានមានប្រសាសន៍ថា អ្វីដែលបានកំណត់រួចហើយ គឺការបោះឆ្នោតជ្រើសរើស សមាជិកព្រឹទ្ធសភា នៅថ្ងៃទី២៥ កុម្ភៈ និងការបោះឆ្នោតជ្រើស សមាជិករដ្ឋសភានៅថ្ងៃទី២៩ កក្កដា ឆ្នាំ២០១៨ខាងមុខ ហើយនឹងបន្តធ្វើតាមការគ្រោងទុក ដោយមិនមានការលើកពេលទាំងអស់ ទោះបីមានបញ្ហាអ្វីកើតឡើងក៏ដោយ ។
សម្ដេចតេជោ ហ៊ុន សែន បានបញ្ជាក់បែកនេះបន្ទាប់ពី កាសែតភ្នំពេញប៉ុស្តិ៍ បានចុះផ្សាយកាលពីព្រឹកថ្ងៃទី១៨ មករានេះ ថា “នាយករដ្ឋមន្ត្រី ហ៊ុន សែន លើកឡើងថា ការបោះឆ្នោតទំនងជាមិនអាចធ្វើទៅបានទេ បើប្រទេសស្ថិតក្នុងស្ថានភាព ច្របូកច្របល់។
សម្ដេចតេជោបញ្ជាក់ថា “យើងប្ដូរផ្តាច់ ជាមួយនឹងដំណើរការ ប្រជាធិបតេយ្យដ៏ទៀងទាត់របស់យើង តាមការគ្រោងទុកពិតប្រាកដរបស់យើង ពិតមែនតែកាលបរិច្ឆេទ ប្រកាសដោយនាយករដ្ឋមន្ត្រី ប៉ុន្តែនាយករដ្ឋមន្ត្រីត្រូវតែ គោរពទៅតាមលក្ខខណ្ឌ ដែលមានចែងនៅក្នុងរដ្ឋធម្មនុញ្ញ នាយករដ្ឋមន្ត្រីគ្មានសិទ្ធិ ចាត់តាំងបោះឆ្នោតមុនការកំណត់ ហើយនាយករដ្ឋមន្ត្រីក៏គ្មានសិទ្ធិ នឹងចាត់តាំងការបោះឆ្នោត ក្រោយការកំណត់នៃរដ្ឋធម្មនុញ្ញដែរ៕
