ចិនអះអាងថា នឹងធ្វើជាខ្នងបង្អែកដ៏រឹងមាំសម្រាប់កម្ពុជា
សារព័ត៌មាន Cambodia News/
ភ្នំពេញ (០១ ធ្នូ ២០១៧) ៖ នៅក្នុងពិធីសាយភោជន៍ជាមហាកិត្តិយស ជូនសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា កាលពីរាត្រីថ្ងៃទី២៩ វិច្ឆិកា ឯកឧត្តម សុង ថាវ រដ្ឋមន្ត្រីក្រសួង ទំនាក់ទំនងអន្តរជាតិ នៃគណៈកម្មាធិការមជ្ឈិមបក្សកុម្មុយនិស្តចិន មានប្រសាសន៍ថា ថ្នាក់ដឹកនាំកំពូលៗ នៃគណៈកម្មាធិការមជ្ឈិមបក្សកុម្មុយនិស្តចិន ធ្វើជាខ្នងបង្អែកដ៏រឹងមាំសម្រាប់កម្ពុជា និងសម្តេចតេជោ ក្នុងការបន្តដឹកនាំរាជរដ្ឋាភិបាល សម្រាប់រយៈពេល យូរអង្វែងតទៅមុខទៀត។
ជាថ្ងៃទី១ នៃ ការស្នាក់អាស្រ័យ អញ្ជើញចូលរួមកិច្ចសន្ទនាថ្នាក់ខ្ពស់ រវាងគណបក្សកុម្មុយនិស្តចិន ជាមួយ និងគណបក្សនយោបាយ នានា លើពិភពលោក នៅរដ្ឋធានីប៉េកាំង ឯកឧត្តម សុង ថាវ មានប្រសាសន៍ដែរថា ថ្នាក់ដឹកនាំបក្ស រដ្ឋ និងប្រជាជន ចិន សូមចាត់ទុកសម្តេចតេជោ នាយករដ្ឋមន្ត្រី ហ៊ុន សែន គឺជាមិត្តដ៏ល្អ មិត្តគួរជាទីទុកបំផុត សម្រាប់ថ្នាក់ដឹកនាំបក្ស រដ្ឋ និងប្រជាជនចិន។
ឯកឧត្តមរដ្ឋមន្ត្រីក៏បានកោតសរសើរចំពោះកំណើនសេដ្ឋកិច្ចរបស់ប្រទេសកម្ពុជា ក្រោមការដឹកនាំរបស់ប្រកបដោយកិត្តិបណ្ឌិតរបស់ សម្តេចតេជោ នាយករដ្ឋមន្ត្រី ក្នុងការពង្រឹងសន្តិភាព សន្តិសុខ ស្ថេរភាពនយោបាយ និងការអភិវឌ្ឍសេដ្ឋកិច្ច សង្គម មានការរីកចម្រើនលើគ្រប់វិស័យ ដែលនោះបានបង្ហាញឲ្យឃើញពីប្រៀបឈ្នះ ក្នុងនាមជាមេដឹកនាំកំពូលមួយរូប ដែលមានបញ្ញាញាណឈ្លាសវៃ និងប៉ិនប្រសព្វបំផុត។
ជាមួយនិងការថ្លែងនោះដែរ សម្តេចតេជោ នាយករដ្ឋមន្ត្រីបានថ្លែងនូវអំណរគុណ ជូនចំពោះបក្ស រដ្ឋ និងប្រជាជនចិន ដែលតែងតែគាំទ្រផ្តល់នូវការជួយឧបត្ថម្ភគ្រប់បែបយ៉ាង ក្នុងការជួយដល់ដំណើរ ការស្តារនិងអភិវឌ្ឍន៍ប្រទេសកម្ពុជាឡើងវិញ។ សម្តេចតេជោ ក៏បានចាត់ទុកថា ការគាំទ្ររបស់ប្រទេសចិន គឺពិតជា មានអត្ថន័យមិនត្រឹមតែបានរួមចំណែកជួយដល់ការជំរុញកំណើនសេដ្ឋកិច្ចជាតិប៉ុណ្ណោះទេ គឺបានរួមចំណែកផងដែរ ដល់ការពង្រឹងឯករាជ្យភាព និងការខ្ពង់មុខ ខ្ពង់មាត់របស់ប្រទេសកម្ពុជាលើឆាកអន្តរជាតិផងដែរ៕
