សម្ដេច ទៀ បាញ់ ប្រកាសឲ្យកងទ័ពទាំងអស់ត្រៀមខ្លួនបង្ការភាពវឹកវរ ខណៈគណបក្សប្រឆាំងនឹងត្រូវរំលាយ
សារព័ត៌មាន Cambodia News/
ភ្នំពេញ (១៧ តុលា ២០១៧) ៖ ក្នុងពិធីផ្សព្វផ្សាយសភាពការណ៍វិវត្តន៍ថ្មីលើវិស័យសន្ដិសុខ ការពារជាតិ ជូននាយទាហានគ្រប់អង្គភាពទាំងអស់ នៃក្រសួងការពារជាតិ និងអគ្គបញ្ជាការ នៅរសៀលថ្ងៃទី១៦ ខែតុលា សម្ដេចពិជ័យសេនា ទៀ បាញ់ បានប្រកាសអំពាវនាវ ដល់កងទ័ពទាំងអស់ត្រូវត្រៀមខ្លួនរួចជាស្រេចប្រឆាំងបុគ្គលទាំងឡាយណា ដែលចង់បង្កភាពវឹកវរដល់សង្គម និងចង់ផ្ដួលរលំរាជរដ្ឋាភិបាលស្របច្បាប់ ខណៈដែលគណបក្សប្រឆាំង នឹងត្រូវរំលាយក្នុងពេលឆាប់ៗខាងមុខនេះ។
ការចេញមកបញ្ជាក់បែបនេះរបស់សម្តេចពិជ័យសេនា ទៀ បាញ់ ខាងលើនេះ បានសំដៅនៅពេលគណបក្សសង្គ្រោះជាតិអាចនឹងត្រូវរំលាយចោលនាពេលខាងមុខ ហើយបើសិនមានសភាពការណ៍ អ្វីកើតឡើងនាំឲ្យចលាចលនៅក្នុងសង្គមនោះ កងទ័ពទាំងអស់នឹងចាត់វិធានការភ្លាមៗ។
សម្តេចពិជ័យសេនា ក៏បានអំពាវនាវដល់មេអង្គភាពទាំងអស់ ត្រូវតែត្រៀមខ្លួនជានិច្ចចំពោះរាល់បទបញ្ជារបស់រាជរដ្ឋាភិបាលក្នុងការកំចាត់បុគ្គលណាដែលចង់ផ្តួលរលំរាជរដ្ឋាភិបាល។
សម្តេចពិជ័យសេនា ទៀ បាញ់ បានបញ្ជាក់ថា បក្សប្រឆាំងជាប់ឆ្នោត៥៥កៅអី មិនដែលបានធ្វើអ្វីនោះទេក្រៅពីធ្វើពហិការមិនចូលប្រជុំក្នុងរដ្ឋសភា។ រាជរដ្ឋាភិបាលហ៊ានចាប់ប្រធានបក្សប្រឆាំងហើយ អ្វីផ្សេងទៀត គឺមិនបង្អែរបង្អង់នោះឡើយ៕
