បុគ្គលិកខេមបូឌា ដេលី ដង្ហោយរកអ្នកជួយសង្គ្រោះបន្ទាប់
សារព័ត៌មាន Cambodia News/
ភ្នំពេញ (២៤ សីហា ២០១៧) ៖ កាលពីថ្ងៃទី ២៣ ខែសីហា បុគ្គលិកខ្មែរនិងបរទេស របស់កាសែត ខេមបូឌា ដេលី (The Cambodia Daily) បានដង្ហោយហៅអ្នកគាំទ្រកាសែតមួយនេះ ឲ្យជួយសង្គ្រោះបន្ទាប់ពីអគ្គនាយកដ្ឋានពន្ធដាដាក់ឱសានវាទឲ្យបង់ពន្ធចំនួន ៦,៣ លានដុល្លារ ឲ្យបានមុនថ្ងៃទី ៤ ខែកញ្ញា។
ក្រោមពាក្យអំពាវនាវ«SAVE THE DAILY CAMBODIA» ដែលបុគ្គលិកកាសែត ខេមបូឌា ដេលី ទាំងជនជាតិខ្មែរនិងបរទេស កាន់នៅនឹងដៃគ្រប់ៗគ្នា គឺជាសារទៅកាន់អ្នកគាំទ្រ ដើម្បីឲ្យជួយសង្គ្រោះកាសែតដ៏មានវ័យចំណាស់និងចេញផ្សាយជាភាសាអង់គ្លេសដំបូងគេនៅកម្ពុជា។ សារដែលធ្វើឡើងតាមរយៈសំណេរនៅលើក្រដាស ហើយបុគ្គលិកកាសែតនេះថតជុំគ្នាបង្ហោះនៅបណ្តាញសង្គមផ្លូវការរបស់កាសែតនេះ ត្រូវបានអ្នកគាំទ្រ ខេមបូឌា ដេលី ផ្សព្វផ្សាយបន្តបន្ទាប់នៅលើបណ្តាញសង្គមនានា។
សូមបញ្ជាក់ថា កាលពីថ្ងៃទី ៥ ខែសីហា អគ្គនាយកដ្ឋានពន្ធដារនៃក្រសួងសេដ្ឋកិច្ច និងហិរញ្ញវត្ថុ បានចេញសេចក្តីជូនដំណឹងដល់កាសែត ខេមបូឌា ដេលី ដោយចោទថា កាសែតនេះមិនបានបង់ពន្ធជូនរដ្ឋតាំងពីឆ្នាំ២០០៧ រហូតដល់ឆ្នាំ២០១៧ដែលមានប្រាក់ពន្ធសរុបចំនួន៦,៣ លានដុល្លារ។
អគ្គនាយកដ្ឋានពន្ធដារ បានទុកពេលឲ្យកាសែតនេះ៣០ថ្ងៃ ដើម្បីបង់ពន្ធជូនរដ្ឋឲ្យបានមុនថ្ងៃទី ៤ ខែកញ្ញាបើមិនដូច្នោះទេ អគ្គនាយកដ្ឋានពន្ធដារនឹងចាត់វិធានការផ្សេងៗ ដូចជាការរឹបអូសទ្រព្យសម្បត្តិ និងបិទការចេញផ្សាយជាដើម៕
