៤ជំហានអាចជួយឲ្យអ្នកមានជីវភាពល្អប្រសើរជាងមុន
ដោយ៖ ហេង នាង
សារព័ត៌មាន Cambodia News/
អប់រំ (១០ សីហា ២០១៧) ៖ ការក្លាយជាអ្នកមានទាមទារឲ្យអ្នកចេះគ្រប់គ្រងលុយដែលរកបានឲ្យបានល្អបំផុត ព្រោះថាសំណាងអាចជួយតិចតួចទេក្នុងការក្លាយជាអ្នកមាន។ ទោះបីសំណាងមិនបានជួយឲ្យអ្នកក្លាយជាអ្នកមានពីកំណើត តែអ្នកអាចជួយខ្លួនឯងបានតាមរយៈការសម្រេចចិត្តយ៉ាងឈ្លាសវៃចំពោះលុយរបស់អ្នក។
អ្នកមិនងាយនឹងក្លាយជាអ្នកមានដោយគ្រាន់តែធ្វើការងារខ្លាំងមួយមុខនោះទេ ដូចនេះអ្នកត្រូវធ្វើជាម្ចាស់លើទ្រព្យរបស់អ្នក ហើយធ្វើការវិនិយោគវាដោយការទទួលខុសត្រូវ។ ដើម្បីចាប់ផ្តើមកសាងទ្រព្យសម្បត្តិផ្ទាល់ខ្លួន ជំហានទាំង៤ខាងក្រោមនេះ អាចជួយឲ្យអ្នកមានជីវភាពល្អប្រសើរជាងមុន។
១. ព្យាយាមចំណាយតិចជាងចំណូលដែលរកបាន ៖ ជំហាននេះងាយនឹងនិយាយ តែពិបាកនឹងធ្វើ។ អ្នកត្រូវកំណត់ពីការចំណាយរបស់អ្នកឲ្យតិចជាងប្រាក់ចំណូលប្រចាំខែរបស់អ្នក ដូចនេះអ្នកនឹងអាចមានគណនីសន្សំ។ អ្នកត្រូវមានផែនការចំណាយ ដោយក្នុងនោះ អ្នកត្រូវកាត់ទុកនូវចំណែកលុយគ្រប់គ្រាន់សម្រាប់បង់វិក័យបត្រ ដោះបំណុល និងចំណាយរស់នៅដោយសមរម្យ ហើយកាត់ទុកមួយចំណែកទៀតសម្រាប់សន្សំ។
២. ដោះបំណុលដែលមានការប្រាក់ខ្ពស់បន្តិចម្តងៗ ៖ ជំហានដំបូងគឺអ្នកត្រូវដោះស្រាយចំពោះបំណុលរបស់អ្នកដោយឈ្លាសវៃ។ បំណុលរារំាងអ្នកមិនឲ្យធ្វើការវិនិយោគ និងទិញទ្រព្យសម្បត្តិថ្មី។ ដើម្បីគ្រប់គ្រងហិរញ្ញវត្ថុរបស់អ្នកឲ្យមាននិរន្តរភាព អ្នកត្រូវដោះបំណុលរបស់អ្នកបន្តិចម្តងៗរហូតដល់អស់ ជាពិសេសត្រូវដោះបំណុលដែលមានអត្រាការប្រាក់ខ្ពស់ឲ្យបានលឿនតាមដែលអាចធ្វើបាន។
៣. មានចំណែកសន្សំទុក ៖ អ្នកមិនអាចដឹងទេថា នឹងអាចមានអ្វីកើតឡើងចំពោះប្រាក់ចំណូលរបស់អ្នក។ ដូចនេះ អ្នកត្រូវមានចំណែកសន្សំទុក ដែលអាចជួយឲ្យអ្នករស់នៅបានដោយគ្មានប្រាក់ចំណូលពី៣ទៅ៦ខែ។ សូម្បីតែម្ចាស់អាជីវកម្មតូចតាចក៏មានចំណែកបម្រុងសម្រាប់ដំណើរការអាជីវកម្ម នៅពេលគេចាប់ផ្តើមអាជីវកម្មដំបូង ឬពង្រីកអាជីវកម្មរបស់ពួកគេ។
៤. ក្លាយជាម្ចាស់លើអ្វីមួយ ៖ ទ្រព្យសម្បត្តិកើតពីភាពជាម្ចាស់ ដូចនេះ បន្ទាប់ពីអ្នកមានចំណែកសន្សំទុករួចហើយ អ្នកត្រូវចាប់ផ្តើមចេះវិនិយោគដូចជាការទិញហ៊ុន ឬប័ណ្ណបំណុល ឬទ្រព្យដែលអាចរីកលូតលាស់ទៅមុខ។ អ្នកត្រូវត្រួតពិនិត្យដំណើរការវិនិយោគរបស់អ្នក ហើយត្រូវបន្តពង្រីកទំហំវិនិយោគរបស់អ្នករហូត។
ប្រែសម្រួលពី៖ (Entrepreneur)
