ជនរងគ្រោះដោយទឹកជំនន់នៅភូមាកំពុងប្រឈមខ្វះខាតស្បៀងអាហារ និងជំងឺ
សារព័ត៌មាន Cambodia News/
ភូមា (០២ សីហា ២០១៧) ៖ មនុស្សប្រហែល៥ពាន់នាក់នៅក្នុងក្រុងមួយនៃតំបន់ Magway នៃប្រទេសមីយ៉ាន់ម៉ាវដែលត្រូវបានជម្លៀសទៅកាន់ជម្រកស្នាក់នៅបណ្ដោះអាសន្នជាច្រើនប្រឈមនឹងការខ្វះខាតស្បៀងអាហារ រួមទាំងជំងឺកំពុងតែគំរាមកំហែងទៅដល់ជីវិត ខណៈដែលជម្រកស្នាក់នៅបណ្ដោះអាសន្នភាគច្រើនដែលត្រូវបានបង្កើតឡើងនោះ មិនសូវមានភាពរឹងមាំទេដើម្បីទប់ទល់នឹងការធ្លាក់ភ្លៀងខ្លាំង។
អ្នកស្រុកបាននិយាយថា ពួកគេមិនពេញចិត្តទេចំពោះស្ថានភាពរស់នៅទីនេះ ហើយពួកគេត្រូវស្វែង រកមធ្យោបាយផ្សេងៗដើម្បីភាពរស់រានរបស់ពួកគេ។ ពួកគេទទួលបានប្រាក់ឧបត្ថម្ភតិចតួចបំផុតពីរដ្ឋាភិបាល ចំណែកទឹកស្អាត និងស្បៀងអាហារក៏មិនបានមកដល់ដៃពួកគេអោយបានគ្រប់គ្រាន់ដែរ។ អ្នកស្រុកជាច្រើនបានចាប់ផ្ដើមធ្លាក់ខ្លួនឈឺ ប៉ុន្តែមន្ទីរពេទ្យក្នុងតំបន់មិនមានលទ្ធភាពទទួលយកពួកគេទាំងអស់ទេ។
គួរបញ្ជាក់ថា តាមនាយកដ្ឋានអាកាសធាតុនៃប្រទេសមីយ៉ាន់ម៉ាបានព្យាករថា ភ្លៀងនឹងបន្តធ្លាក់នៅក្នុងផ្នែកភាគច្រើន នៃប្រទេសមីយ៉ាន់ម៉ាដែលនេះមានន័យថា ទឹកជំនន់អាចនឹងកាន់តែអាក្រក់ទៅៗ ហើយហានិភ័យនៃការផ្ទុះឡើងនៃជំងឺឆ្លងផ្សេងៗនឹងកើនឡើងខ្ពស់នៅតាមជម្រកស្នាក់នៅបណ្ដោះអាសន្នទាំងនោះ៕
