ធ្លាក់ឧទ្ធម្ភាគចក្រជិតភ្នំភ្លើងនៅប្រទេសឥណ្ឌូនេស៊ីស្លាប់មនុស្ស៨នាក់
សារព័ត៌មាន Cambodia News/
ឥណ្ឌូនេស៊ី (០៣ កក្កដា ២០១៧) ៖ ក្រុមមន្ត្រីបាននិយាយនៅថ្ងៃចន្ទថា ឧទ្ធម្ភាគចក្រជួយសង្គ្រោះមួយគ្រឿងបានធ្លាក់ខណៈពេលដែលកំពុងធ្វើដំណើរទៅជួយជម្លៀសប្រជាជននៅជិតភ្នំភ្លើងមួយលើកោះដ៏សំខាន់របស់ប្រទេសឥណ្ឌូនេស៊ីដោយបានសម្លាប់មនុស្សទាំង៨នាក់នៅក្នុងឧទ្ធម្ភាគចក្រនេះ។
ឧទ្ធម្ភាគចក្រមួយគ្រឿងនេះបានធ្លាក់ក្នុងរយៈពេលប្រហែលបីនាទីមុនពេលទៅដល់តំបន់ទេសចរណ៍ដ៏ល្បីល្បាញ Dieng Plateau ដែលជាកន្លែងការផ្ទុះភ្នំភ្លើងកាលពីថ្ងៃអាទិត្យបានធ្វើឲ្យមនុស្សយ៉ាងតិច១០នាក់រងរបួស។ ឧទ្ធម្ភាគចក្រនេះត្រូវបានរាយការណ៍ថាបានបុកថ្មចោតនៅលើភ្នំ Butak ក្នុងស្រុក Temanggung នៃខេត្ត Central Java ។
លោកឧត្តមសេនីយ៍ឯក Heronimus Guru អនុប្រធានផ្នែកប្រតិបត្ដិនៃភ្នាក់ងាររុករកនិងជួយសង្គ្រោះជាតិបាននិយាយថា មនុស្សទាំង៨នាក់នៅលើយន្ដហោះនោះបានស្លាប់។ លោកបានប្រាប់សារព័ត៌មាន Associated Press ថា “ឥឡូវនេះយើងកំពុងស្ថិតនៅឯមន្ទីរពេទ្យ Bhayangkara នៅក្រុង Semarang ដែលជាទីរួមខេត្ត Central Java ដែលជាកន្លែងសពរបស់ជនរងគ្រោះត្រូវបានគេបញ្ជូនទៅ”។
ស្របពេលជាមួយគ្នានោះ ឧត្តមសេនីយត្រី Ivan Tito នាយកប្រតិបត្តិការនិងបណ្តុះបណ្តាលនៅទីភ្នាក់ងាររុករកបានប្រាប់ស្ថានីយទូរទស្សន៍ TVOne ក្នុងការសម្ភាសផ្ទាល់មួយពី Temanggung ថា ជនរងគ្រោះទាំងនោះគឺមានមន្ត្រីកងទ័ពជើងទឹកចំនួន៤នាក់និងអ្នកជួយសង្គ្រោះ៤នាក់។ លោកក៏បាននិយាយផងដែរថា ឧទ្ធម្ភាគចក្រ Dauphin AS365 ដែលផលិតនៅឥណ្ឌូណេស៊ី៕
