ក្រសួងអប់រំ នឹងរៀបចំកម្មវិធីអក្ខរកម្មសម្រាប់កម្មករកម្មការិនីនៅថ្ងៃទី២៩ ឧសភា
សារព័ត៌មាន Cambodia News/
ភ្នំពេញ (២៤ ឧសភា ២០១៧) ៖ ក្រសួងអប់រំ យុវជន និងកីឡាក្នុងកិច្ចសហការយ៉ាងជិតស្និទ្ធជាមួយអង្គការយូណេស្កូ និងអង្គការដៃគូស៊ីប៉ានឹងរៀបចំសិក្ខាសាលាថ្នាក់ជាតិមួយស្តីពីកម្មវិធីអក្ខរកម្មសម្រាប់កម្មករកម្មការិនីនៅតាមរោងចក្រនៅថ្ងៃច័ន្ទទី២៩ ខែឧសភា ឆ្នាំ២០១៧ នៅសណ្ឋាគារកាំបូឌីយ៉ាណា ។
កម្មវិធីអក្ខរកម្មសម្រាប់កម្មករកម្មការិនីនៅតាមរោងចក្រនេះគឺជាគំនិតផ្តួចផ្តើមដ៍ល្អមួយដែលអាចឆ្លើយតបបានយ៉ាងមានប្រសិទ្ធិភាពទៅនឹងការជួយឲ្យជនពេញវ័យនិងជាពិសេសស្តី្រវ័យក្មេងៗដែលធ្វើការនៅក្នុងរោងចក្រទាំងនោះទទួលបានចំណេះដឹងអក្ខរកម្មមូលដ្ឋានព្រមទាំងផ្តល់អំណាចដល់ពួកគេឲ្យយល់ដឹងពីសិទ្ធិជាមូលដ្ឋានសំខាន់ដ៍ទៃទៀតសម្រាប់កែលម្អជីវិតរស់នៅប្រចាំថ្ងៃរបស់ពួកគេ ។
សិក្ខាសាលានេះនឹងមានការអញ្ជើញចូលរួមពីសិក្ខាកាមចំនួន៨០នាក់មកពីនាយកដ្ឋានជំនាញរបស់ក្រសួងអប់រំ យុវជននិងកីឡា មកពីរោងចក្រចំនួន២៤នៅរាជធានីភ្នំពេញនិងតាមបណ្តាខេត្ត ក្រសួងពាក់ព័ន្ធ ដៃគូរអភិវឌ្ឍ អង្គការមិនមែនរដ្ឋាភិបាលនានា និង គ្រូអក្ខរកម្ម ៕
