សម្ដេចតេជោ អំពាវនាវឲ្យប្រជាពលរដ្ឋកម្ពុជាក្នុងម្នាក់ចេះកីឡាមួយយ៉ាងតិច
សារព័ត៌មាន Cambodia News/
ភ្នំពេញ (០៤ មេសា ២០១៧) ៖ សម្ដេចអគ្គមហាសេនាបតីតេជោហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានអំពាវនាវឲ្យប្រជាពលរដ្ឋកម្ពុជា ត្រូវចូលរួមក្នុងសកម្មភាពកីឡាទាំងអស់គ្នា គាំទ្រនិងហាត់កីឡាទាំងអស់គ្នា ដោយយ៉ាងហោចណាស់ ក្នុងម្នាក់ចេះកីឡាមួយប្រភេទ។
ប្រសាសន៍របស់សម្ដេចតេជោបែបនេះ បានធ្វើឡើងក្នុងឱកាសដែលសម្ដេចបានអញ្ជើញ សម្ពោធដាក់ឲ្យប្រើប្រាស់នូវប្រព័ន្ធហេដ្ឋារចនាសម្ព័ន្ធកីឡាមួយចំនួននៅពហុកីឡដ្ឋានមរតកតេជោ ព្រមទាំងបើកការដ្ឋានសាងសង់កីឡដ្ឋានបាល់ទាត់ នៅព្រឹកថ្ងៃទី០៤ ខែមេសា ឆ្នាំ២០១៧។
ក្នុងឱកាសនេះដែរ សម្ដេចបានលើកឡើងថា “…ថ្ងៃនេះវិស័យកីឡារបស់យើង គឺពិតជាបានមានសមិទ្ធផលថ្មីដើម្បីអភិវឌ្ឍវិស័យកីឡា ។ខ្ញុំសុំអភ័យទោសម្ដង តែបានពន្យារពេលស៊ីហ្គេម ទៅដល់ឆ្នាំ២០២៣ កម្ពុជាបានអាកខានក្នុងទសវត្ស៦០ និងអាកខានម្ដងទៀត នៅក្នុងឆ្នាំ២០០០កន្លងទៅ…មូលហេតុនៃការពន្យារ ដោយសារសមិទ្ធផលកីឡារបស់យើង ត្រូវបានបំផ្លាញទាំងស្រុង តម្រូវការរបស់យើង គឺកសាងមន្ទីរពេទ្យ ប្រឡាយទឹក ហេដ្ឋារចនាសម្ព័ន្ធ ជូនប្រជាពលរដ្ឋ បានជាកម្ពុជាសុំពន្យារពេល ធ្វើជាម្ចាស់ផ្ទះស៊ីហ្គេម…”៕
