សាលាក្រុងបកស្រាយពីបំណងចង់ដកទូATM ក្រោយរងការរិះគន់
សារព័ត៌មាន Cambodia News/
ភ្នំពេញ (២២ មីនា ២០១៧) ៖ ក្រោយសារព័ត៌មានក្នុងស្រុកមួយចំនួនបានចុះផ្សាយពីប្រសាសន៍លោកអភិបាលក្រុងនូវបំណងចង់លុបបំបាត់ទូATMទូទាំងប្រទេស ដើម្បីបង្ការទប់ស្កាត់រាល់សកម្មភាពភេរវកម្ម ក៏ដូចជាបញ្ហាអសន្តិសុខជាដើមនោះ សាធារណជនបានរិះគន់យ៉ាងចាស់ដៃ។ ក៏ប៉ុន្តែប៉ុន្មានម៉ោងក្រោយការរិះគន់ សាលាក្រុងក៏បានចេញមុខបកស្រាយពីចេតនាដែលខ្លួនបានលើកឡើង។
លោកអភិបាលបានបញ្ជាក់ថា ទូបើកលុយATM តាមទីសាធារណៈទាំងអស់របស់ធនាគារឯកជន នឹងប្រឈមនឹងការលុបបំបាត់ទាំងស្រុង ដោយសារតែមិនមានអ្នកការពារ និងមើលថែឲ្យមានសុវត្ថិភាព បណ្ដាលឲ្យមានបទល្មើស បង្កអសន្តិសុខដល់សង្គម។ នេះសម្ដីរបស់លោកអភិបាលក្រុងដែលត្រូវបានបណ្ដាញសារព័ត៌មានក្នុងស្រុកមួយចំនួន បានចុះផ្សាយក្រោយពីបញ្ចប់កិច្ចប្រជុំគណៈបញ្ជាការឯកភាពរដ្ឋបាលរាជធានី ដើម្បីពិភាក្សាស្ដីពីវិធានការបង្ការទប់ស្កាត់សកម្មភាពភេរវកម្ម និងពិនិត្យលើការងារអនុវត្ដ ភូមិសង្កាត់មានសុវត្ថិភាពនៅរសៀលថ្ងៃទី២០ ខែមីនា ឆ្នាំ២០១៧។
ឆ្លើយតបនឹងមតិ ខាងលើ លោកម៉េត មាសភក្ដី អ្នកនាំពាក្យសាលាក្រុងភ្នំពេញបានចេញមុខបកស្រាយតំណាងឲ្យលោកអភិបាលក្រុងថា អ្វីដែលលោកអភិបាលបានលើកឡើងមិនដូចអ្វីដែលសារព័ត៌មានមួយចំនួនចុះផ្សាយនោះទេ។ លោកអះអាងថា ជាចេតនារបស់លោកប៉ា សុជាតិវង្ស គ្រាន់តែចង់ដាស់ស្មារតីឲ្យគ្រប់ម្ចាស់ទូATMតាមទីសាធារណៈទាំងអស់ យកចិត្តទុកដាក់ឲ្យបានខ្ពស់លើបញ្ហាសន្តិសុខ សុវត្ថិភាព ក្រៅពីការគិតគូរពីបញ្ហាសេដ្ឋកិច្ច ឬផលចំណេញរបស់អាជីវកម្ម៕
