ជិះកង់ផ្សព្វផ្សាយពីព្រឹត្តិការណ៍អង្គរសង្ក្រាន្តឆ្នាំ២០១៧
សារព័ត៌មាន Cambodia News/
សៀមរាប (១៨ មីនា ២០១៧) ៖ ក្រុមការងារទំនាក់ទំនងសាធារណៈនៃព្រឹត្តិការណ៍អង្គរសង្ក្រាន្ត រួមជាមួយនឹងថ្នាក់ដឹកនាំ និងយុវជនស្ម័គ្រចិត្តសហភាពសហព័ន្ធយុវជនកម្ពុជា ខេត្តសៀមរាប មន្ត្រីអាជ្ញាធរជាតិអប្សរាមន្ត្រីរាជការនិងនិស្សិតមកពីបណ្តាសាកលវិទ្យាល័យនានាក្នុងខេត្តប្រមាណ១៦០ នាក់កាលពីព្រឹកថ្ងៃទី១៧ ខែមីនា បានមកជួបជុំគ្នានៅទីតាំងខាងមុខព្រះអង្គចេក ព្រះអង្គចមរួមគ្នាជិះកង់ឆ្ពោះទៅទីលានមុខប្រាសាទអង្គរវត្ត ដើម្បីបង្កើនការផ្សព្វផ្សាយពីព្រឹត្តិការណ៍អង្គរសង្ក្រាន្តឆ្នាំ២០១៧ឲ្យកាន់តែមានភាពទូលំទូលាយក្នុងចំណោមហាជនជាតិ និងអន្តរជាតិ។
អ្នកជិះកង់ដែលពាក់អាវពណ៌ទឹកក្រូចស្រស់ និងមានភ្ជាប់ជាមួយសារសរសេរថា “អង្គរសង្ក្រាន្តជារបស់យើងទាំងអស់គ្នា” និង“ប្រាំឆ្នាំនៃភាពអស្ចារ្យ” បានជិះកង់ជាជួរតាមលំអាន ដែលកង់នីមួយៗមានចងភ្ជាប់ជាមួយនឹងប៉ោងៗចម្រុះពណ៌នៅរានកង់ប៉ែកខាងក្រោយ។
ធ្វើដំណើរមកដល់មុខប្រាសាទអង្គរវត្ត អ្នកជិះកង់បានប្រមូលផ្តុំគ្នាឈរជាជួរដើម្បីផ្គុំចេញជាលេខ៥ ដើម្បីជាការអបអរសាទរខួប៥ ឆ្នាំនៃការប្រារព្ធព្រឹត្តិការណ៍អង្គរសង្ក្រាន្ត (២០១៣-២០១៧) និងបានបិទបញ្ចប់ព្រឹត្តិការណ៍ជិះកង់នេះដោយការថតរូបជុំគ្នា ជាមួយនឹងការស្រែកកញ្ជៀវនូវឃ្លា អង្គរសង្ក្រាន្តជារបស់យើងទាំងអស់គ្នា៕
