រាជធានីភ្នំពេញ នឹងមានច្រាំងទន្លេ សួនច្បារ និងផ្លូវថ្មើរជើងយ៉ាងល្អប្រណីតនៅឆ្នាំ២០១៧នេះ
សារព័ត៌មាន Cambodia News/
ភ្នំពេញ (០២ កុម្ភៈ ២០១៧) ៖ ក្នុងកិច្ចប្រជុំជាមួយមន្ត្រីតំណាងកំពង់ផែស្វយ័តក្រុងភ្នំពេញ និងមន្ត្រីជំនាញពាក់ព័ន្ធក្រោមឱវាទ ដើម្បីពិភាក្សាទៅលើគម្រោងស្ថាបនាសួនច្បារ ផ្លូវថ្មើរជើង តាមមាត់ទន្លេដំណាក់កាលទី៣ ចាប់ពីផ្សាររាត្រីដល់ស្ពានជ្រោយចង្វា ក្នុងសង្កាត់ស្រះចក ខណ្ឌដូនពេញ កាលពីរសៀលថ្ងៃទី០១ កុម្ភៈកន្លងទៅ លោក ប៉ា សុជាតិវង្ស អភិបាលរាជធានីភ្នំពេញ បានលើកឡើងថា អាជ្ញាធរភ្នំពេញកំពុងពន្លឿនការងារស្ថាបនាច្រាំងទន្លេ និងផ្លូវថ្មើរជើងនេះឲ្យបានលឿន និងជុំរុញឲ្យរួចរាល់មុនព្រះរាជពិធីបុណ្យអុំទូកចុងឆ្នាំនេះ។
លោក អភិបាលរាជធានីភ្នំពេញ បានបន្តថា សម្រាប់ព្រះរាជពិធីបុណ្យអុំទូកឆ្នាំ២០១៧នេះ រាជធានីភ្នំពេញ នឹងមានច្រាំងទន្លេ សួនច្បារ និងផ្លូវថ្មើរជើងយ៉ាងល្អប្រណីត ស្របតាមមាត់ទន្លេចាប់ពីស្ពានព្រះមុនីវង្សរហូតដល់គល់ស្ពានជ្រោយចង្វា ដែលបង្កលក្ខណៈងាយស្រួលដល់ប្រជាពលរដ្ឋធ្វើដំណើរកំសាន្ត និងទស្សនាព្រះរាជពិធីបានយ៉ាងស្រួល បន្ទាប់ពីអាជ្ញាធរស្ថាបនាច្រាំងទន្លេ សួនច្បារ និងផ្លូវថ្មើរជើង ដំណាក់កាលទី៣រួច ។
គូរបញ្ជាក់ថា ការស្ថាបនាច្រាំងទន្លេ សួនច្បារ និងផ្លូវថ្មើរជើងចាប់ពីផ្សាររាត្រីដល់ស្ពានជ្រោយចង្វារនេះ ជាគម្រោងដំណាក់កាលទី៣ មានប្រវែងប្រមាណ១៦៤០ម៉ែត្រ បន្ទាប់ពីដំណាក់កាលទី១ ចាប់ពីបញ្ជរទេសចរជាប់សាលសន្និសីទចតុមុខដល់កំពង់ដរអរីយក្សត្រ បានស្ថាបនារួច និងដំណាក់កាលទី២ ចាប់ពីកំពង់ដរអរីយក្សត្ររហូតដល់គល់ស្ពានព្រះមុនីវង្ស កំពុងស្ថាបនា ហើយទិសដៅបន្ត រដ្ឋបាលរាជធានីភ្នំពេញគ្រោងស្ថាបនារហូតដល់គល់ស្ពានព្រែកព្នៅតែម្តង ៕
