សម្តេច ហ៊ុន សែន សូមឱ្យប្រជាពលរដ្ឋទទួលយកផលប្រយោជន៍ពីសុខសន្តិភាព
សារព័ត៌មាន Cambodia News/
ភ្នំពេញ (៣០ មករា ២០១៧) ៖ ជារឿយៗសម្តេចតេជោ ហ៊ុន សែន តែងលើកឡើងពីអត្ថប្រយោជន៍នៃសុខសន្តិភាពពេញបរិរូរណ៍ទូទាំងប្រទេស ដែលជាឱកាសមាសប្រាស់ និងភាពសុខសាន្តរបស់ប្រជាពលរដ្ឋ។
សម្តេចតេជោ ហ៊ុន សែន បានបញ្ជាក់ថា «នៅពេលខ្ញំធ្វើដំណើរតាមរថយន្តទៅតាមខេត្តដូចពេលនេះ ខ្ញុំតែងនឹកស្រម័យទៅដល់ពេលវេលាដែលប្រទេសយើងមានសង្គ្រាម។
ពេលនោះមិនត្រឹមតែប្រជាជនគ្មានមធ្យោបាយធ្វើដំណើរ ផ្លូវជួបការលំបាកប៉ុណ្ណោះទេ តែអ្វីដែលលំបាកជាងទៀតគឺការវាយប្រហារដោយប្រដាប់អាវុធទៅលើរថយន្ត រថភ្លើង កាណូត និងមធ្យោបាយធ្វើដំណើរផ្សេងទៀតដែលធ្វើឱ្យប្រជាជនយើងស្លាប់ និងរបួសយ៉ាងច្រើន»។
សម្តេចបញ្ជាក់ថា ថ្ងៃនេះសម្តេចមានឱកាសចូលផឹកកាហ្វេនៅហាង ៣៣៣ ពេជ្រនឹល ដែលនៅមិនឆ្ងាយពីកន្លែងគោរពបូជាលោកយាយម៉ៅ។
តាមរយៈកាហ្វេមួយកែវ ទឹកតែមួយកែវ និងការសំណេះសំណាលជាមួយបងប្រុស បងស្រី ក្មួយប្រុស ក្មួយស្រីនិងចៅៗនៃគ្រួសារម្ចាស់ហាងធ្វើឱ្យសម្តេចកាន់តែមានការសប្បាយរីករាយដែលបានរួមចំណែករំដោះប្រជាជនចេញពីរបបប៉ុលពត ដឹកនាំប្រទេសចេញសង្គ្រាមមកកាន់សន្តិភាពតាមរយៈនយោបាយឈ្នះឈ្នះ និងមានការអភិវឌ្ឍដូចសព្វថ្ងៃ៕
