២៨នាក់ស្លាប់ និង ៦៤នាក់ទៀតរងរបួសក្នុងការបំផ្ទុះគ្រាប់បែកអត្តឃាត ២លើកនៅភាគខាងលិចទីក្រុងកាប៊ុល
សារព័ត៌មាន Cambodia News/
អាហ្វហ្គានីស្ថាន (១១ មករា ២០១៦) ៖ មន្ត្រីក្រសួងមហាផ្ទៃអាហ្វហ្គានីស្ថាននិយាយឲ្យដឹងថា មនុស្សចំនួន ២៨នាក់បានស្លាប់ និង ៦៤នាក់ទៀតរងរបួសក្នុងការបំផ្ទុះគ្រាប់បែកអត្តឃាត ២លើកក្បែរការិយាល័យរដ្ឋាភិបាល នៅតាមបណ្ដោយផ្លូវធ្វើដំណើរយ៉ាងមមាញឹកភាគខាងលិចទីក្រុងកាប៊ុលកាលពីថ្ងៃអង្គារម្សិលមិញ។
ការបំផ្ទុះលើកទី១ ត្រូវបានគេធ្វើឡើងនៅច្រកចូលទៅកាន់ការិយាល័យរដ្ឋាភិបាល ហើយគ្រាប់បែកទី២ ក៏ត្រូវបានគេបញ្ជាឲ្យផ្ទុះឡើងនៅក្នុងរថយន្តតូចមួយគ្រឿង ដែលមានគោលដៅវាយប្រហារទៅលើរថយន្តដឹកបុគ្គលិកការិយាល័យសភាជាតិ។ អ្នកនាំពាក្យក្រសួងមហាផ្ទៃអាហ្វហ្គានីស្ថានបន្តថា អ្នកស្លាប់រួមមានមន្ត្រីនគរបាល ៤រូប និងជនស៊ីវិល ២៤នាក់។ បន្ទាប់ពីមានការផ្ទុះកើតឡើងនោះ កងកម្លាំងនគរបាលអាហ្វហ្គានីស្ថានបានបិទផ្លូវធ្វើដំណើរ ដើម្បីត្រួតពិនិត្យកន្លែងកើតហេតុ។
ក្រោយរយៈពេលប៉ុន្មានម៉ោងនៃការផ្ទុះកើតឡើង ក្រុមតាលីបង់អាហ្វហ្គានីស្ថានបានអះអាងទទួលខុសត្រូវ ចំពោះការវាយប្រហារអត្តឃាតទាំង ២លើកនេះ។ ចំណែកកងសន្តិសុខជាតិអាហ្វហ្គានីស្ថានបានប្រកាសថា ខ្លួនបានបាញ់សម្លាប់ក្រុមភេរវករ ៤៣នាក់ និងចាប់ខ្លួនជនសង្ស័យភេរវករជាង ៣០នាក់នៅទូទាំងប្រទេស បន្ទាប់ពីមានការបំផ្ទុះគ្រាប់បែករួចមកនោះ៕
