រថយន្តដឹកកម្មករបុកជាមួយរថយន្ត CRV បណ្តាលឲ្យមនុស្ស ២៥នាក់ របួសធ្ងន់ស្រាល
សារព័ត៌មាន Cambodia News/
ព្រះសីហនុ (១៤ តុលា ២០១៦) ៖ កាលពីថ្ងៃទី១៣ តុលា ម្សិលមិញ មានករណីគ្រោះថ្នាក់ចរាចរណ៍មួយបានកើតឡើង រវាងរថយន្តសាំយ៉ុងដឹកកម្មករ បានបុកជាមួយរថយន្តម៉ាក CRV ស្ថិតលើកំណាត់ផ្លូវជាតិលេខ៤ ត្រង់ចន្លោះគីឡូម៉ែត្រ១៩៣-១៩៤ ស្ថិតក្នុងភូមិអូរចំណារ ឃុំអូរឧកញ៉ាហេង ស្រុកព្រៃនប់ ខេត្តព្រះសីហនុបណ្តាលឲ្យកម្មករចំនួន ២៥នាក់ រងរបួសធ្ងន់ស្រាល ។
លោក យ៉ូវ ខេមរា ប្រធានមន្ទីរការងារ និងបណ្តុះបណ្ដាលវិជ្ជាជីវៈខេត្តព្រះសីហនុ បានឲ្យដឹងថា ករណីគ្រោះថ្នាក់ចរាចរណ៍នេះ បង្កឡើងដោយរថយន្ត១គ្រឿងម៉ាក CRV ពណ៌ទឹកប៊ិច ពាក់ស្លាកលេខ ភ្នំពេញ2B-6692 បើកបរដោយជនជាតិម៉ាឡេស៊ីម្នាក់ ឈ្មោះLow kok Beng ភេទប្រុស អាយុ២៦ឆ្នាំ ស្នាក់នៅភ្នំពេញ បានបើកមកបុកជាមួយរថយន្តសាំយ៉ុង ពណ៌ទឹកប្រាក់ ពាក់ស្លាកលេខ ព្រះសីហនុ2A-5863 ដឹកកម្មកររោងចក្រ ទិសដៅបញ្ជ្រាស់គ្នានោះ បណ្តាលឲ្យរថយន្តដឹកកម្មករ ធ្លាក់ចូលព្រៃក្រឡាប់ជាច្រើនត្រលប់ មានមនុស្សរបួសស្រាល២១នាក់ និងធ្ងន់៤នាក់។
ក្រោយពេលកើតហេតុ នគរបាលជំនាញ បានទៅជួយអន្តរាគមន៍ និងបានបញ្ជូនជនរងគ្រោះទៅគ្លីនិកឯកជនវាលរេញ។ ដោយឡែករថយន្តទាំង២គ្រឿង ត្រូវបានស្ទូចយកទៅរក្សាទុកនៅអធិការដ្ឋាននគរបាលស្រុកព្រៃនប់ រង់ចាំដោះស្រាយបន្ត៕
