តំណាងបណ្ដាញផ្សព្វផ្សាយជាង ២០ស្ថាប័នស្នើសុំឲ្យរដ្ឋមន្ត្រីក្រសួងព័ត៌មានចាត់ការអាចារ្យអេ
សារព័ត៌មាន Cambodia News/
ភ្នំពេញ (២៧ កញ្ញា ២០១៦) ៖ កាលពីថ្ងៃទី២៦ កញ្ញា តំណាងបណ្ដាញផ្សព្វផ្សាយជាង ២០ ស្ថាប័ននៅកម្ពុជាបានជួបប្រជុំគ្នាស្នើសុំឲ្យរដ្ឋមន្ត្រីក្រសួងព័ត៌មានចាត់វិធានការបន្ទាន់ចំពោះថ្នាក់ដឹកនាំ និងបុគ្គលិកវិទ្យុ ABC ១០៧.៥ Mhz កុំឲ្យប្រើពាក្យសម្ដីអសុរោះការចោទប្រកាន់មួលបង្កាច់មកលើអ្នកសារព័ត៌មាន និងមន្ត្រីសាធារណៈដោយគ្មានមូលដ្ឋាន។
នៅក្នុងលិខិតដែលចេញដោយក្រុមអ្នកសារព័ត៌មាន បានថ្លែងថាលោក សេង ប៊ុនវេង ហៅ អាចារ្យអេ ប្រធានវិទ្យុ ABC ១០៧.5 Mhz និងសហការីបានផ្សព្វផ្សាយជាសាធារណៈមួលបង្កាច់ និងចោទប្រកាន់ដោយគ្មានមូលដ្ឋានលើមន្ត្រីក្នុងស្ថាប័នសាធារណៈជាបន្តបន្ទាប់ហើយចុងក្រោយវិទ្យុនេះបានហៅ និងបន្តហៅអ្នកកាសែតថាជាកាសែតចោរដែលបង្កើតបរិយាកាសអាប់អួ និងយល់ច្រឡំគ្នា។
ក្នុងលិខិតនោះបានសូមឲ្យវិទ្យុនេះ បញ្ឈប់ការអត្ថាធិប្បាយចោទប្រកាន់ប្រមាថមាក់ងាយ និងបញ្ចេញទស្សនៈជាបុគ្គលប៉ាតណាប៉ាតណីដោយគ្មានប្រភព គ្មានសីលធម៌ និងគ្មានភ័ស្ដុតាងហើយបានសុំឲ្យ អាចារ្យអេ ត្រូវចេញមុខបំភ្លឺពាក្យពេចន៍ដែលគាត់បានប្រើ និងត្រូវការសុំទោសជាសាធារណៈដើម្បីបង្កើតបរិយាកាសយោគយល់គ្នា និងលើកកម្ពស់សេចក្ដីថ្លៃថ្នូររបស់ប្រជាជនកម្ពុជា។
លិខិតថ្លែងថា “កន្លងមកនិងថ្មីៗមកនេះដែលលោក អាចារ្យអេ បាននិយាយជាសាធារណៈតាមវិទ្យុ ABC ដោយប្រមាថមន្ត្រីសាធារណៈ ស្ត្រី និងអ្នកសារព័ត៌មានគឺមានដូចជាករណីវិវាទជាមួយមន្ត្រីសុខាភិបាលបានហៅពេទ្យថា៖ «ពេទ្យតិរច្ឆាន»។ និយាយឲ្យនារីបម្រើភ្ញៀវនៅតាមរង្គសាលខារ៉ាអូខេទៅធ្វើជា៖ «ស្រីសំផឹង»។ ករណីប៉ះជាមួយមន្ត្រីនគរបាលម្នាក់ក៏បានចោទថា៖ «ក្រសួងមហាផ្ទៃចិញ្ចឹមពួក ម៉ាហ្វីយ៉ា»។ និងបានហៅអ្នក កាសែត ថា «កាសែតចោរ»។”
លិខិតនោះបន្តថា “យើងខ្ញុំទាំងអស់គ្នាសូមគាំទ្រនូវបំណងក្នុងការលើកកម្ពស់សីលធម៌វិជ្ជាជីវៈ និងជួយកែលម្អចំណុចខ្វះខាតក្នុងវិស័យសារព័ត៌មាននៅកម្ពុជា”៕
