លោកតាអាយុ ៧២ឆ្នាំត្រូវរថយន្តឈ្នួញកិនបែកក្បាលស្លាប់
សារព័ត៌មាន Cambodia News/
ភ្ន្នំពេញ (៣០ សីហា ២០១៦) ៖ នៅវេលាម៉ោង៧ និង៣០នាទីព្រឹកថ្ងៃទី៣០ ខែ សីហា នេះ លោកតាអាយុ៧២ឆ្នាំម្នាក់ត្រូវ រថយន្តឈ្នួលជែងគ្នាជ្រុលបុក និងកិនបណ្តាលឲ្យស្លាប់ភ្លាមនៅចំណុចខាងមុខការ៉ាស់សាំងតេលា ស្ថិតនៅក្នុងភូមិចំបក់មាស សង្កាត់បាក់ខែង ខណ្ឌជ្រោយចង្វារ រាជធានីភ្នំពេញ យ៉ាងអាណោចអាធ័ម ខណៈកំពុងជិះកង់នៅតាមបណ្តោយផ្លូវជាតិលេខ៦ ក្នុងទិសដៅពីជើងមកត្បូង។
ជនរងគ្រោះមានឈ្មោះ គុជ លន់ ភេទប្រុស អាយុ៧២ឆ្នាំ ស្នាក់នៅភូមិក្តីចាស់ សង្កាត់បាក់ខែង ខណ្ឌជ្រោយចង្វា។
ករណីនេះបង្កឡើងរវាងរថយន្តរត់ឈ្នួលម៉ាកសាំយ៉ុងពណ៌សពាក់ស្លាក់ លេខភ្នំពេញ2L-9454 បើកបដោយយុវជនម្នាក់ឈ្មោះ ឆន រ៉ាវុធ អាយុ១៨ឆ្នាំ ស្នាក់នៅភូមិដីក្រហម ឃុំមៀន ស្រុកព្រៃឈរ ខេត្តកំពង់ចាម បើកមកពីក្រោយ ហើយជែងរថយន្តមួយគ្រឿងទៀតធ្វើដំណើរស្របទិសគ្នា ក៏ជ្រុលចង្កូតទៅបុកកិនបែកក្បាលបណ្តាលឲ្យស្លាប់តែម្តង។
ចំណែករថយន្តបង្កបានព្យាយាម បើករត់គេចតែត្រូវបានសមត្ថកិច្ចដេញតាមចាប់បានទាំងរថយន្ត និងតៃកុងរួចប្រគល់ឲ្យកម្លាំងការិយាល័យក្រុងចាត់ការបន្ត។
ក្រោយកើតហេតុរថយន្តបង្ក កង់របស់ជនរងគ្រោះ និងតៃកុងរថយន្តត្រូវបានបញ្ជូនទៅកាន់ការិយាល័យចរាចរណ៍ផ្លូវគោក រាជធានីភ្នំពេញចាត់ការបន្តតាមនីតិវិធីច្បាប់៕
