ប៉ូលីសថៃរកឃើញគ្រាប់បែកមិនទាន់ផ្ទុះ៥គ្រាប់ ក្រោយការវាយប្រហារបំផ្ទុះគ្រាប់បែកជាបន្តបន្ទាប់
សារព័ត៌មាន Cambodia News/
ថៃ (១៥ សីហា ២០១៦) ៖ កាលពីចុងសប្ដាហ៍កន្លងទៅនេះ ប៉ូលិសថៃ បានរកឃើញគ្រាប់បែកមិនទាន់ផ្ទុះចំនួន៥គ្រាប់និងបានបំផ្លាញចោល នៅពេលដែលក្រុមអ្នកវាយប្រហារមួយដែលគេមិនស្គាល់អត្តសញ្ញានៅឡើយនោះ បានធ្វើការវាយប្រហារដោយ បំផ្ទុះគ្រាប់បែកជាបន្តបន្ទាប់នៅតំបន់រមណីយដ្ឋានទេសចរណ៍ថៃ កាលពីចុងសប្តាហ៍មុន។
ការវាយប្រហារនេះបានកើតឡើងតែប៉ុន្មាន ថ្ងៃប៉ុណ្ណោះបន្ទាប់ពីប្រជាជនថៃបានបោះឆ្នោតគាំងរដ្ឋធម្មនុញ្ញ ដែលគាំទ្រដោយពួកយោធាដែលបានដណ្តើមអំណាចកាលពីឆ្នាំ២០១៤ ដោយការធ្វើរដ្ឋប្រហារ។
មិនមានក្រុមណាមួយបានប្រកាសទទួលខុសត្រូវចំពោះការវាយប្រហារទាំងនេះទេ។ ប៉ូលីសថៃ បាននិយាយថា ជនសង្ស័យបំផ្ទុះគ្រាប់បែកម្នាក់ត្រូវបានចាប់ខ្លួន បន្ទាប់ពីការវាយប្រហារដោយបំផ្ទុះគ្រាប់បែកនិងសកម្មភាពលួចដុត បំផ្លាញ កាលពីថ្ងៃព្រហស្បតិ៍និងថ្ងៃសុក្រ ដោយបានសម្លាប់មនុស្សចំនួន៤នាក់និងមនុស្ស៣៥នាក់ដែលរួមទាំង ជនបរទេសច្រើននាក់ផងដែរនោះ បានរងរបួស នៅតំបន់រមណីយដ្ឋានទេសចរណ៍ដ៏ល្បីបំផុតមួយចំនួននៅប្រទេសថៃ ភាគខាងត្បូង៕
