ទស្សនីយភាពល្ខោនខោលធ្វើអោយយុវជនជាច្រើនចាប់អារម្មណ៍ទៅទស្សនាផ្ទាល់
សារព័ត៌មាន Cambodia News/
ភ្នំពេញ (១២ កក្កដា ២០១៦) ៖ កាលពីថ្ងៃទី១១ ខែកក្កដា ឆ្នាំ២០១៦ ល្ខោនខោល ជាទស្សនីយភាព សិល្បៈរបស់ខ្មែរ ដ៏មានវ័យចំណាស់ ដែលពេលនេះ បានធ្វើអោយយុវជនជាច្រើន ចាប់ផ្តើមចាប់អារម្មណ៍ និងបានទៅទស្សនា ដោយផ្ទាល់ ពីការសម្តែងមួយ នៅសាលា មធ្យមវិចិត្រសិល្បៈ។
អ្នកទស្សនា ប្រមាណជាងមួយពាន់នាក់ ដែលក្នុងនោះ ភាគច្រើន ជាយុវវ័យ បានបញ្ជ្រៀតគ្នា ចូលទស្សនាល្ខោនខោល ដែលជាការសម្តែងដោយកម្រ រឿងរាមកេរ្តិ៍ឈុត «ថលតយ័ន្ត» ដែលសម្តែងដោយសិស្ស សិល្បករ និងសាស្ត្រាចារ្យ នៃសាលាមធ្យមវិចិត្រសិល្បៈ។
ការសម្តែង ល្ខោនខោល រឿងរាមកេរ្តិ៍ ឈុត «ថលតយ័ន្ត» បានធ្វើឲ្យអ្នកទស្សនា នៅក្នុងសាល និងអ្នកទស្សនា នៅខាងក្រៅសាល ដោយការបញ្ចាំងបន្តផ្ទាល់ ពីក្នុងសាល នាំគ្នាទះដៃកងរំពង ជាមួយនឹងក្តីរំភើប ដោយមោទនភាព និងការស្វាគមន៍ក្រុមសិល្បករ៕
