ផ្ទុះគ្រាប់បែកអត្តឃាតនៅកណ្ដាលទីក្រុងបេរ៉ូតបណ្ដាលឲ្យមនុស្ស ២នាក់រងរបួស
សារព័ត៌មាន Cambodia News/
លីបង់ (១៣ មិថុនា ២០១៦) ៖ សាក្សី និងសន្តិសុខនិយាយថា ការផ្ទុះមួយបានប៉ះទង្គិចចំកណ្ដាលទីក្រុងបេរ៉ូត នៅខាងក្រៅសាខាមួយនៃធនាគារ Blom Bank របស់ប្រទេសលីបង់បណ្ដាលឲ្យខូចខាតអគារ។ មិនមានសេចក្ដីរាយការណ៍ពីមនុស្សបាត់បង់ជីវិតឡើយ ប៉ុន្តែមនុស្ស ២នាក់រងរបួសស្រាល។ រីឯមូលហេតុនៃការបំផ្ទុះយ៉ាងណានោះ គេនៅមិនទាន់បានដឹងភ្លាមៗទេ។
ពាក់ព័ន្ធនឹងហេតុការណ៍នេះរដ្ឋមន្ត្រីក្រសួងមហាផ្ទៃ របស់ប្រទេសលីបង់បានប្រាប់អ្នកសារព័ត៌មានរ៉យទ័រថា វាច្បាស់ណាស់ថា ការវាយប្រហារដោយគ្រាប់បែកនេះដាក់គោលដៅលើធនាគារ Blom Bank។
សូមបញ្ជាក់ថា ការវាយប្រហារដោយគ្រាប់បែក ពីសំណាក់ក្រុមមិនស្គាល់អត្តសញ្ញាណ នៅកណ្ដាលទីក្រុងបេរ៉ូតរបស់ប្រទេសលីបង់នេះ កើតឡើងអំឡុងពិធីបុណ្យរ៉ាម៉ាដាននៃសាសនាអ៊ីស្លាម៕
