រាជាយស្ម័យយាន្តនឹងបើកដំណើរការឡើងវិញ ពីរាជធានីភ្នំពេញទៅខេត្ដព្រះសីហនុ នៅថ្ងៃទី៩ ខែមេសាខាងមុខ
សារព័ត៌មាន Cambodia News/
ភ្នំពេញ (២៣ មីនា ២០១៦) ៖ រាជាយស្ម័យយាន្តនឹងចាប់ដំណើរការដឹកអ្នកដំណើរឡើងវិញនៅថ្ងៃទី៩ ខែមេសា ឆ្នាំ២០១៦ នេះ ដើម្បីអបអរសាទរពីបុណ្យចូលឆ្នាំថ្មីប្រពៃណីជាតិ ចូលឆ្នាំវក អដ្ឋសក បន្ទាប់ខកខានជាង២០ឆ្នាំ។
ពេលវេលា ចេញដំណើរពីភ្នំពេញ គឺនៅម៉ោង ៧ព្រឹក ឆ្ពោះទៅខេត្តព្រះសីហនុ ដោយអាចផ្ទុកអ្នកដំណើរដែលចូលចិត្តធ្វើដំណើរទស្សនាទេសភាពធម្មជាតិ ព្រៃភ្នំព្រឹក្សា បានពី ១៣០ ទៅ១៦៥នាក់។
ចំពោះ តម្លៃសំបុត្រក្នុងការធ្វើដំណើរតាមរថភ្លើងវិញ ពីរាជធានីភ្នំពេញទៅខេត្ដព្រះ សីហនុសំបុត្រថ្លៃ៧ដុល្លារ ក្នុងមនុស្សម្នាក់ មានបម្រើអាហារសម្រន់ និងភេសជ្ជផងដែរដោយប្រើរយៈពេល៨ម៉ោងលើចម្ងាយផ្លូវ ២៦០គីឡូម៉ែត្រ។
ចំណែក ចេញដំណើរពីរាជធានីភ្នំពេញ ទៅខេត្ដតាកែវ តម្លៃសំបុត្រថ្លៃ៥ដុល្លារ ក្នុងមនុស្សម្នាក់ ខណៈពី ភ្នំពេញទៅកំពត ថ្លៃ៦ដុល្លារ ក្នុងមនុស្សម្នាក់ បើកបរយឺតៗក្នុងល្បឿនជាមធ្យមពី៣០ ទៅ៤០គីឡូម៉ែត្រ ក្នុង១ម៉ោង។ ដោយហេតុចំនួនសំបុត្រមានកំណត់ ដូច្នេះបើចង់ធ្វើដំណើរតាមរថភ្លើង លុះត្រាតែទិញ ឬកក់សំបុត្រទុកមុន៕
