សម្តេច ហ៊ុន សែន ថា ការបើកប្រាក់ខែតាមធនាគារជាការជួយកាត់បន្ថយអំពើពុករលួយ
សារព័ត៌មាន Cambodia News/
ភ្នំពេញ (០៩ មីនា ២០១៦) ៖ ក្នុងពិធីចែកសញ្ញាបត្រដល់គ្រូបញ្ចប់ការសិក្សាគរុកោសល្យដែលធ្វើឡើងនៅ វិទ្យាស្ថានជាតិអប់រំ នៅព្រឹកថ្ងៃពុធនេះ សម្តេច ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានមានប្រសាសន៍ថា រដ្ឋាភិបាលបានសម្រេចប្រើប្រាស់បច្ចេកវិទ្យា ក្នុងការប្រយុទ្ធប្រឆាំងនឹងអំពើពុករលួយ ដោយសម្តេចបានលើកឡើងករណីបើកប្រាក់ខែមន្រ្តីរាជការតាមធនាគារ ជាចំណាត់ការមួយលុបបំបាត់”មន្រ្តីខ្មោចបើកប្រាក់ខែ”។
ក្នុងពិធីចែកសញ្ញាបត្រដល់គ្រូបញ្ចប់ការសិក្សាគរុកោសល្យដែលធ្វើឡើងនៅ វិទ្យាស្ថានជាតិអប់រំ សម្តេច ហ៊ុន សែន បានលើកឡើងពីករណីមន្រ្តីខ្មោច ដែលសម្តេចថា មិនចេះមកបើកប្រាក់ខែនោះទេ។ សម្តេចលើកឡើងករណីផ្សេងទៀតដូចជាមន្រ្តីពន្ធកាត់កងប្រាក់ផ្ទាល់ជាមួយ អ្នកបង់ពន្ធ ដែលសម្តេចថានេះអាចនាំឲ្យមានការប្រព្រឹត្តអំពើពុករលួយ។
សម្តេច ហ៊ុន សែន បន្តថា៖ “មួយទៀត មន្រ្តីខ្មោច ខ្មោចវាអត់ចេះទៅបើគណនីនៅធនាគារទេ។ ឥឡូវខ្ញុំចូលទៅដល់ គេហៅថាប្រើបច្ចេកវិទ្យាព័ត៌មានដើម្បីប្រយុទ្ធប្រឆាំងនឹងអំពើពុករលួយឬ អំពើមិនប្រក្រតី។ ប្រើប្រាស់ប្រព័ន្ធធនាគារ បង់ពន្ធក៏អញ្ចឹងដែរ។ កុំឲ្យមន្រ្តីពន្ធជួបជាមួយអ្នកបង់ពន្ធ ក្រែងលោវាកាត់កងគ្នា បង់តាមធនាគារ អញ្ចឹងវាអត់កាត់កងគ្នាបានទេ”៕
