ក្មេងស្រី ២នាក់ ត្រូវរថយន្តបែនដឹកដីបុក និងកិនស្លាប់អណោចអធ័ម
សារព័ត៌មាន Cambodia News/
ភ្នំពេញ (២៦ កុម្ភៈ ២០១៦) ៖ ក្មេងស្រីសិស្សវិទ្យាល័យឫស្សីកែវ២នាក់ ត្រូវរថយន្តបែនដឹកដី បើកបុកនិងកិនអូសចូលក្រោម រថយន្ត បណ្តាលឲ្យស្លាប់យ៉ាងអណោចអធ័ម នៅកន្លែងកើតហេតុ នៅរសៀលថ្ងៃទី២៦ ខែកុម្ភៈ នេះ ស្ថិតនៅភូមិស្វាយប៉ាក សង្កាត់ស្វាយប៉ាក ខណ្ឌឫស្សីកែវ ខណៈយុវជនម្នាក់ទៀតដែលបើកឌុបក្មេងស្រីទាំង២ បានរងរបួសធ្ងន់។
ប្រភពព័ត៌មាន ពីកន្លែងកើតហេតុបានឲ្យដឹងថា ក្មេងស្រីរងគ្រោះទាំងពីរនាក់ ទី១ឈ្មោះ ឡាន់ ចរិយា អាយុ១៦ឆ្នាំ ទី២ឈ្មោះ ចាន់ សុបុណ្ណារី អាយុ១៦ឆ្នាំ និងយុវជនរបួសធ្ងន់ឈ្មោះ យ៉ាត ធារ៉ា អាយុ១៩ឆ្នាំ ចំណែកអ្នកបើករថយន្តបង្ក បានរត់គេចខ្លួនបាត់ស្រមោលតែម្តង។
ប្រភពព័ត៌មានដដែល បានបន្តថា មុនពេលកើតហេតុ រថយន្តដឹកដីពាក់ស្លាកលេខភ្នំពេញ 3D-3432 បានធ្វើដំណើរពីលិចទៅកើត ហើយជនរងគ្រោះទាំង៣នាក់ បានធ្វើដំណើរពីកើតទៅលិច លុះដល់ចំណុចផ្លូវបំបែក ក៏ត្រូវរថយន្តមកបុកហើយអូសម៉ូតូចូលទៅក្រោមរថយន្ត កិនស្លាប់គរលើគ្នាយ៉ាងអណោចអធ័ម៕
