ស្រីស្រស់ រពឹសដៃលួចទូរស័ព្ទគេ ត្រូវប៉េអឹមក្របួចជាប់
សារព័ត៌មាន Cambodia News/
សៀមរាប ៖ នារីរូបស្រស់ស្អាតម្នាក់ ត្រូវបានអាវុធហត្ថខេត្តសៀមរាបធ្វើការឃាត់ខ្លួន តាមពាក្យ បណ្ដឹងជនរងគ្រោះ ដោយចោទថា បានលួចទូរស័ព្ទ១គ្រឿង ម៉ាកអាយហ្វូនសិកផ្លាស់ ព័ណ៌ទឹកមាស ខណៈសាកថ្មទុកចោលក្នុងផ្ទះ។ នេះបើតាមការឲ្យពី មន្ត្រីអាវុធហត្ថខេត្តសៀមរាប។
ហេតុការណ៍នេះបានកើតឡើងនៅម៉ោង១១និង៤០នាទី ថ្ងៃទី២០ ខែធ្នូ ឆ្នាំ២០១៥ ស្ថិតនៅភូមិតាវៀន សង្កាត់សាលាកំរើក ក្រុងសៀមរាប។ ជនសង្ស័យមានឈ្មោះ សុក ច័ន្ទស្រីមី ភេទស្រី អាយុ២៥ឆ្នាំ មុខរបរមិនពិតប្រាកដ រស់នៅភូមិតាវៀន សង្កាត់សាលាកំរើក ក្រុងសៀមរាប។
មន្ត្រីអាវុធហត្ថបន្ថែមថា ជនរងគ្រោះឈ្មោះ អ៊ុំ មាតី ភេទស្រី អាយុ២៣ឆ្នាំ បច្ចុប្បន្នរស់នៅ ភូមិតាវៀន សង្កាត់សាលា កំរើក ក្រុងសៀមរាប មុខរបរលក់ដូរ គឺដោយសារជនរងគ្រោះអង្គុយមើលទូរទស្សន៍នៅមុខបន្ទប់ ហើយទុកទូរស័ព្ទនៅក្នុងបន្ទប់។
មន្ត្រីអាវុធហត្ថបញ្ជាក់ថា ក្រោយឃាត់ខ្លួន ដកហូតបានទូរស័ព្ទដែលជនសង្ស័យលួចបាន ហើយប្រគល់ឲ្យម្ចាស់ដើមវិញ។ ជនសង្ស័យ ត្រូវបានកសាងសំណុំរឿងបញ្ជូនទៅតុលាការ ដើម្បីអនុវត្តទៅតាមផ្លូវច្បាប់៕
