កូនអកតញ្ញូ ទាញអង្រែវាយឪពុកស្លាប់ ម្តាយរងរបួសធ្ងន់
សារព័ត៌មាន Cambodia News/
ព្រៃវែង (៣០ កញ្ញា ២០១៥) ៖ កូនអកតញ្ញូម្នាក់ខឹងឪពុកម្តាយស្តីប្រដៅតិចតួច បានទាញអង្រែបុកគ្រឿងវាយទៅលើឪពុកម្តាយវ័យចំណាស់បណ្តាលឲ្យឪពុកស្លាប់ តាមផ្លូវពេលបញ្ជូនទៅសង្រ្គោះនៅមន្ទីរពេទ្យបង្អែកខេត្តកំពង់ចាម ចំណែកម្តាយរងរបួសធ្ងន់កំពុងសង្រ្គោះ។
ហេតុការណ៍នេះបានកើតឡើងនៅម៉ោងជាង១១យប់ថ្ងៃទី២៩កញ្ញា ស្ថិតនៅក្នុងភូមិគោកគង់កើត ឃុំគោកគង់លិច ស្រុកកញ្រ្ចៀច ខេត្តព្រៃវែង។
ជនដៃដល់ឈ្មោះ ហន ហឿន អាយុ៤៥ឆ្នាំ បានត្រូវសមត្ថកិច្ចឃាត់ខ្លួនភ្លាមៗក្រោយបង្កហេតុ។ ចំណែកជនរងគ្រោះជាឪពុកដែលកូនវាយចំផ្ទៃមុខនិងថ្គាមខាងឆ្វេងហើយស្លាប់ឈ្មោះ ថាត ថន អាយុ៦៧ឆ្នាំ និងម្តាយឈ្មោះ ប៊ូ នាត អាយុ៦៦ឆ្នាំ របួសធ្ងន់លើផ្ទៃមុខនិងបាក់ដៃឆ្វេង រស់នៅភូមិឃុំកើតហេតុខាងលើ។
ក្រោយពីកើតហេតុភ្លាម កម្លាំងសមត្ថកិច្ចមូលដ្ឋាន បានចុះមកអន្តរាគមន៍ និងឃាត់ខ្លួនជនល្មើសជាកូនបញ្ជូនមកកាន់អធិការដ្ឋាន នគរបាលស្រុកកញ្ជ្រៀច ដើម្បីសាកសួរ និងកសាងសំណុំរឿង បញ្ជូនទៅសាលាដំបូងខេត្ត៕
