វិញ្ញាសាប្រឡងបាក់ឌុប ឆ្នាំនេះ មាន ៧ មុខវិជ្ជា និងរយៈពេលប្រឡងត្រឹមតែ ២ ថ្ងៃ
សារព័ត៌មាន Cambodia News/
ភ្នំពេញ (១៩ សីហា ២០១៥) ៖ ក្រសួងអប់រំយុវជន និងកីឡា បានផ្សព្វផ្សាយនូវតារាងប្រព្រឹត្តទៅនៃវិញ្ញាសាប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា ឬការប្រឡងបាក់ឌុប សម្រាប់ថ្នាក់វិទ្យាសាស្ត្រ និងថ្នាក់វិទ្យាសាស្ត្រសង្គម សម័យប្រឡង នាថ្ងៃទី២៤ និងថ្ងៃទី២៥ ខែសីហា ឆ្នាំ២០១៥។
ក្នុងនោះ សម្រាប់ថ្នាក់និមួយៗ គឺមាន ៧ វិញ្ញាសា រួមមាន៖ នៅថ្ងៃចន្ទ ទី២៤ ខែសីហា ឆ្នាំ២០១៥ ពេលព្រឹក ចាប់ពីម៉ោង ៧ និង ៣០ នាទី ដល់ម៉ោង ៩៖ គីមីវិទ្យា។ ចំណែកម៉ោង ៩ និង ៣០ នាទី ដល់ម៉ោង ១១៖ ជីវវិទ្យា។ ពេលរសៀល ម៉ោង ១៤ ដល់ម៉ោង ១៥៖ ប្រវត្តិវិទ្យា និងម៉ោង ១៥ និង ៣០ នាទី ដល់ម៉ោង ១៦ និង ៣០ នាទី៖ ភាសាបរទេស។ នៅថ្ងៃអង្គារ ទី២៥ ខែសីហា ឆ្នាំ២០១៥ ពេលព្រឹក ម៉ោង ៧ និង ៣០ នាទី ដល់ម៉ោង ៩៖ អក្សរសាស្ត្រខ្មែរ និងម៉ោង ៩ និង ៣០ នាទី ដល់ម៉ោង ១១៖ រូបវិទ្យា។ ពេលរសៀល ម៉ោង ១៤ ដល់ម៉ោង ១៦ និង ៣០ នាទី៖ គណិតវិទ្យា។
តារាងវិញ្ញាសាដដែល បង្ហាញថា ថ្នាក់វិទ្យាសាស្ត្រសង្គម រួមមានវិញ្ញាសា ៧ មុខ ដូចគ្នា គឺនៅថ្ងៃចន្ទ ទី២៤ ខែសីហា ឆ្នាំ២០១៥ ពេលព្រឹក ម៉ោង ៧ និង ៣០ នាទី ដល់ម៉ោង ៩៖ ភូមិវិទ្យា និងម៉ោង ៩ និង ៣០ នាទី ដល់ម៉ោង ១១៖ ប្រវត្តិវិទ្យា។ ពេលរសៀល ម៉ោង ១៤ ដល់ម៉ោង ១៥៖ ជីវវិទ្យា និងម៉ោង ១៥ និង ៣០ នាទី ដល់ម៉ោង ១៦ និង ៣០ នាទី៖ ភាសាបរទេស។ ចំណែកថ្ងៃអង្គារ ទី២៥ ខែសីហា ឆ្នាំ២០១៥ ពេលព្រឹក ម៉ោង ៧ និង ៣០ នាទី ដល់ម៉ោង ៩ ព្រឹក៖ គណិតវិទ្យា ចំណែកម៉ោង ៩ និង ៣០ នាទី ដល់ម៉ោង ១១ ព្រឹក៖ សីលធម៌-ពលរដ្ឋវិជ្ជា។ ពេលរសៀល ម៉ោង ១៤ ដល់ម៉ោង ១៦ និង ៣០ នាទី៖ អក្សរសាស្ត្រខ្មែរ។
ក្រសួងអប់រំយុវជន និងកីឡា ក៏បានផ្សព្វផ្សាយផងដែរថា ការប្រឡងសញ្ញាប័ត្រមធ្យមសិក្សាទុតិយភូមិ ឬប្រលងបាក់ឌុប នៅឆ្នាំនេះ មានបេក្ខជនសរុប ៨៨.៤៨៨ នាក់ និងមានមណ្ឌលប្រឡងចំនួន ១៥០ មណ្ឌល នៅទូទាំងប្រទេស។ មណ្ឌលប្រឡងទាំងនោះ ត្រូវបានរៀបចំប្រមូលផ្តុំនៅទីប្រជុំជន ក្នុងទីរួមខេត្តរាជធានី៕
