ព្រះមហាក្សត្រប្រកាសឲ្យប្រើប្រាស់ច្បាប់ស្តីពីការត្រួតពិនិត្យផលិតផលថ្នាំជក់
សារព័ត៌មាន Cambodia News/
ភ្នំពេញ( ១២ មិថុនា ២០១៥) ៖ ព្រះមហាក្សត្រ ព្រះបាទនរោត្តមសីហមុនី បានប្រកាសឲ្យប្រើប្រាស់ច្បាប់ស្តីពីការត្រួតពិនិត្យផលិតផលថ្នាំជក់ ដែលច្បាប់នេះនឹងដាក់ទោសទណ្ឌជាប់ពន្ធនាគារ និងការពិន័យជាប្រាក់ចំពោះអ្នកលក់ និងអ្នកចែកចាយផលិតផលថ្នាំជក់ ដែលប្រព្រឹត្តខុសតាមការកំណត់។
សេចក្តីព្រាងច្បាប់ស្តីពីការត្រួតពិនិត្យផលិតផលថ្នាំជក់ ត្រូវបានរដ្ឋសភាបានអនុម័តកាលពីថ្ងៃទី០៨ខែមេសា ឆ្នាំ២០១៥។ ព្រះរាជក្រម ដែលចុះព្រះហត្តលេខាដោយព្រះមហាក្សត្រ នៅថ្ងៃទី១៨ ខែឧសភា ឆ្នាំ២០១៥ ឲ្យដឹងថាច្បាប់នេះមាន ១៣ជំពូក និង៤៩មាត្រា ដែលមានគោលបំណងដើម្បី«ការពារសុខភាពសាធារណៈ និងកាត់បន្ថយផលប៉ះពាល់ដល់សុខភាព សេដ្ឋកិច្ច សង្គម និងបរិស្ថាន ដែលបណ្តាលមកពីផលិតផលថ្នាំជក់»។
បើតាមច្បាប់នេះ ចំពោះការដាក់តាំងបង្ហាញកញ្ចប់ផលិតផលថ្នាំជក់ធម្មតា អាចធ្វើទៅបានតែនៅនឹងកន្លែងលក់ ឬតូបលក់ ឬក្នុងហាងលក់បារីផ្ទាល់តែប៉ុណ្ណោះ។
យោងតាមច្បាប់នេះ ផលិតករថ្នាំជក់ក្នុងស្រុក និងអ្នកនាំចូលផលិតផលថ្នាំជក់គ្រប់ប្រភេទ សម្រាប់ធ្វើការចែកចាយ លក់ និងប្រើប្រាស់ដែលមិនអនុវត្តទៅតាមការកំណត់របស់ច្បាប់ នឹងត្រូវពិន័យជាប្រាក់ចន្លោះពី១លានទៅ២០លានរៀល និងការជាប់ពន្ធនាគារពី១ខែទៅ៦ខែ។
ជនណាដែលលក់ឬចែកចាយផលិតផលថ្នាំជក់គ្រប់ប្រភេទនៅក្នុងបរិវេណនៃគ្រឹះស្ថានសិក្សា គ្រឹះស្ថានសុខាភិបាល សួនកុមារ គ្រឹះស្ថានសាសនា សារមន្ទីរ រមណីយដ្ឋានប្រវត្តិសាស្រ្ត កន្លែងហាត់ប្រាណ ស្ថានីយប្រេងឥន្ធនៈ និងកន្លែងងាយឆាបឆេះ ត្រូវពិន័យជាប្រាក់ពី១០ម៉ឺនទៅ១លានរៀល៕
