សិស្សស្រីម្នាក់ត្រូវ សិស្សប្រុសម្នាក់វៃដំក្នុងថ្នាក់រៀន (មានវីដេអូ)
សារព័ត៌មាន Cambodia News/
ភ្នំពេញ (២៥ ឧសភា ២០១៥) ៖ កាលពីថ្ងៃទី២១ ខែឧសភា ឆ្នាំ២០១៥ មានវីដេអូមួយមានរយៈពេលបីនាទីជាង បង្ហាញពីសកម្មភាព អំពើហិង្សាមួយ ក្នុងថ្នាក់រៀន នៅវិទ្យាល័យដំដែក ខេត្តសៀមរាប ដោយសិស្សបុ្រសម្នាក់ បានដាល់ទៅលើ សិស្សស្រីម្នាក់ទៀតចំនួន៣ដៃ ហើយបានអុកកែង ពីលើកញ្ចឹងក បណ្តាលឱ្យនាងស្រែកយំពេញថ្នាក់រៀន។ [ អានបន្ត ]
ក្រោយមកក្រសួងអប់រំ យុវជន និងកីឡា កាលពីថ្ងៃអាទិត្យ បានចេញលិខិតមួយច្បាប់ ដោយស្នើឱ្យវិទ្យាល័យដំដែក ស្ថិតនៅឃុំដំដែក ស្រុកសូទ្រនិគម ខេត្តសៀមរាប ដាក់ពិន័យដល់សិស្សប្រុសមាឌធំម្នាក់ ដែលបានវាយដំទៅលើសិស្សស្រីម្នាក់ទៀត នៅក្នុងថ្នាក់រៀនរបស់ពួកគេ។
សេចក្តីប្រកាសរបស់ក្រសួងអប់រំ យុវជន និងកីឡា ដែលចុះនៅថ្ងៃទី២៤ ខែឧសភា ឆ្នាំ២០១៥ បានស្នើឱ្យ វិទ្យាល័យដំដែក បង្កើតក្រុមប្រឹក្សាវិន័យ ដើម្បីមានវិធានការអប់រំ ចំពោះអ្នកប្រព្រឹត្តខុស ទៅតាមកម្រិតកំហុស ដោយណែនាំស្តីបន្ទោស ចុះក្នុងសៀវភៅសិក្ខាគារិក ហើយព្រមានជាលាយលក្ខណ៍អក្សរ និង តម្រូវឱ្យសិស្ស ដែលប្រព្រឹត្តកំហុសនោះ ធ្វើការងារពលកម្មបម្រើសហគមន៍ នៅក្នុងវិទ្យាល័យដំដែក ក្នុងគោលដៅកុំ ឱ្យទង្វើបែបនេះ កើតឡើងនៅពេលក្រោយៗទៀត និងចៀសវាងសិស្សដទៃទៀតយកតម្រាប់តាម៕
