ក្រសួងធនធានទឹក ប្រកាសអាសន្នពីជំនន់ទឹកភ្លៀង
សារព័ត៌មាន Cambodia News/
ភ្នំពេញ (០៦ តុលា ២០១៦) ៖ ក្រសួងធនធានទឹក និងឧត្តុនិយម បានឲ្យដឹងកាលពីថ្ងៃទី៥ តុលា ម្សិលមិញ ថា ដោយសារមានភ្លៀងធ្លាក់ច្រើនជាប់ៗគ្នា នឹងធ្វើឲ្យខេត្ដមួយចំនួនរបស់កម្ពុជាប្រឈមនឹងជំនន់ទឹកភ្លៀង ចាប់ពីថ្ងៃទី៩ ដល់ថ្ងៃទី១៣ ខែតុលា ឆ្នាំ ២០១៦។
ក្រសួងនេះ បានព្យាករថា ខ្យល់មូសុងនិរតី បាននឹងកំពុងបន្តឥទ្ធិពលលើព្រះរាជាណាចក្រកម្ពុជា។ ប្រព័ន្ធសម្ពាធទាបបន្តអូសកាត់លើភាគខាងជើងប្រទេសកម្ពុជា បណ្ដាលឲ្យតំបន់វាលទំនាប និងខ្ពង់រាបមានភ្លៀងធ្លាក់រាយប៉ាយ ក្នុងបរិមាណពីមធ្យមទៅច្រើន។ ចំណែកតំបន់មាត់សមុទ្រ អាចនឹងមានភ្លៀងធ្លាក់ពីមធ្យមទៅបង្គួរ។
ក្នុងនោះក្រសួងធនធានទឹក ក៍បានប្រកាសអាសន្នផងដែរសម្រាប់ខេត្ត រតនគិរី មណ្ឌលគិរី ព្រះវិហារ ឧត្តរមានជ័យ កំពង់ធំ កំពង់ស្ពឺ និងមួយផ្នែកនៃខេត្តបន្ទាយមានជ័យ សៀមរាប និងខេត្តបាត់ដំបង អាចនឹងមានភ្លៀងធ្លាក់ច្រើនជាប់ៗគ្នា នឹងបង្ករឲ្យមានជំនន់ទឹកភ្លៀងចាប់ពីថ្ងៃទី៩ ដល់ថ្ងៃទី១៣ ខែតុលា ឆ្នាំ២០១៦ ៕
