អ្នកម្នាងផល្លា ត្រូវបានបញ្ជូន ទៅសង្គ្រោះនៅមន្ទីរបំរុងរ៉ាត់ ប្រទេសថៃ
សារព័ត៌មានយុវវ័យថ្មី/
ភ្នំពេញ (២៧ មេសា ២០១៥) ៖ តាមការឲ្យដឺងពីសំណាក់លោក ញេប ប៊ុនជិន អ្នកនាំពាក្យគណបក្សហ្វ៊ុនស៊ិនប៉ិច អ្នកម្នាងផល្លា ត្រូវបានបញ្ជូនយក ទៅសង្គ្រោះបន្ទាន់ នៅមន្ទីរបំរុងរ៉ាត់ ប្រទេសថៃ ខណ:ស្ថានភាព គ្រោះថ្នាក់ ធ្ងន់ធ្ងរ ដោយបញ្ជូនចេញ ពីមន្ទីរពេទ្យកាល់ម៉ែត កាលពីវេលាម៉ោង ១០ និង ៣០នាទី ព្រឹក ថ្ងៃទី២៦ ខែមេសា តាមរថយន្តមន្ទីរពេទ្យ រ៉ូយ៉ាល់រតន:។ [ អានបន្ត ]
នៅក្នុងជួបគ្រោះថ្នាកចរាចរណ៍ជាមួយរថយន្តដឹកដី នេះ សម្ដេចក្រុមព្រះ នរោត្តម រណឫទ្ធិ និងអ្នកម្នាង អ៊ុក ផល្លា រួមទាំងអង្គរក្ស បានរងរបួសធ្ងន់ និងស្រាល ស្ថិតនៅតាមផ្លូវជាតិលេខ៧ នៅឃុំខ្វិតធំ ស្រុកព្រៃឈរ ខេត្ត កំពង់ចាម កាលពីវេលាម៉ោងប្រមាណជាង ១២ថ្ងៃត្រង់ ថ្ងៃទី២៥ ខែមេសា ឆ្នាំ២០១៥។
គួរបញ្ជាក់ផងដែរថា ការជួបគ្រោះថ្នាកចរាចរណ៍នេះ បានកើតឡើងបន្ទាប់ពីសម្តេចក្រុមព្រះ និងអ្នកម្នាង អ៊ុក ផល្លា រួមទាំងមន្ត្រីជាន់ខ្ពស់គណបក្សហ្វ៊ុនស៊ិនប៉ិចមួយចំនួន បានវិលត្រឡប់មកពីជួបសំណេះសំណាលជាមួយសមាជិក សមាជិកានៅវត្តគ ភូមិគ ឃុំគ ស្រុកព្រៃឈរ ខេត្តកំពង់ចាម។
សម្តេចក្រុមព្រះ និងអ្នកម្នាង បានជិះរថយន្តម៉ាក BMW ពណ៌ប្រផេះ ពាក់ស្លាកលេខ ភ្នំពេញ 2AC-1611 ធ្វើដំណើរពីកើតទៅលិច ឆ្ពោះមកភ្នំពេញ ដោយមានរថយន្តស៊ីរ៉េន បើកពីមុខក្បួន។
ប៉ុន្តែនៅពេលដល់ចំណុចកើតហេតុ រថយន្តដឹកដីក៏បានបើកមកបុករថយន្តរបស់សម្តេចក្រុមព្រះ ចំពីចំហៀងខាងឆ្វេង បណ្តាលឲ្យរថយន្ត BMW របស់សម្តេចក្រុមព្រះ បានផ្ទុះពោងសុវត្ថិភាព និងបែកកញ្ចក់៕
