ទណ្ឌិត ៨១២ នាក់ នឹងត្រូវបន្ធូរបន្ថយ និងលើកលែងទោស
សារព័ត៌មាន Cambodia News/
ភ្នំពេញ (២៦ មីនា ២០១៥) ៖ ទណ្ឌិតដែលនឹងត្រូវបន្ធូរបន្ថយ និងលើកលែងទោស ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ នាពេលខាងមុខនេះ មានចំនួន ៨១២ នាក់ ក្នុងនោះស្រី ៦៨ នាក់ ។ នេះបើតាមការឲ្យដឹងពី លោកឧត្តមសេនីយ៍ឯក គុយ ប៊ុនសន អគ្គនាយកនៃអគ្គនាយកដ្ឋានពន្ធនាគារ ក្រសួង មហាផ្ទៃ កាលពីថ្ងៃទី២៥ ខែមីនាម្សិលមិញ។
លោកឧត្តមសេនីយ៍ឯក បានបន្តថា ចំពោះទណ្ឌិតម្នាក់ ទទួលបានការបន្ធូរបន្ថយទោស បានតែម្តងគត់ ក្នុងមួយឆ្នាំ។ ជាមួយគ្នានោះដែរ ចំនួនទណ្ឌិតទាំងអស់ខាងលើ គណៈកម្មការ ជាពិសេសលេខាធិការដ្ឋាន នឹងសម្អាតបញ្ជីខ្លះ អាចមានការប្រែប្រួល”។
លោកឧត្តមសេនីយ៍ឯក បានបញ្ជាក់ថាៈ “ជួនកាល ទណ្ឌិតម្នាក់ មានសាលក្រមពីរ ឬ បី ប៉ុន្តែក្នុងលក្ខខណ្ឌ យើងលើកបានតែ សាលក្រមណាមួយទេ ហើយត្រូវសាលក្រមនោះ គ្រប់លក្ខខណ្ឌទៀត ឧទាហរណ៍ បើបន្ថយ ត្រូវតែឲ្យគ្រប់មួយភាគបី បើលើកលែង ត្រូវតែឲ្យគ្រប់ពីរភាគបី” ៕
