អតីត​សមាជិកសភាថៃ ​២៥០នាក់ ​ប្រឈម​មុខនឹង​ការ​ចោទ​ប្រកាន់​ ពី​បទ​ចង់​កែ​រដ្ឋធម្មនុញ្ញ​​

គណៈកម្មាធិការប្រឆាំងអំពើពុករលួយជាតិ ហៅកាត់ថា NACC បានឲ្យដឹងថា ក្នុងពេលកាន់អំណាចគណបក្ស ភឿថៃ របស់លោកស្រី យ៉ីងឡាក់ មានបំណងធ្វើវិសោធនកម្មច្បាប់ ដែលមានលក្ខណៈរំលោភទៅលើ រដ្ឋធម្មនុញ្ញរបស់ថៃ។

គណៈកម្មាធិការប្រឆាំងអំពើពុករលួយជាតិ បានសម្រេចបញ្ជូនរឿងក្តីទៅកាន់រដ្ឋសភា នៅថ្ងៃទី១២ ខែមីនា ឆ្នាំ២០១៥ ដើម្បី ចោទប្រកាន់ លើអតីតសមាជិកសភាទាំង២៥០នាក់ ដែលបានចុះហត្ថលេខា សម្រេចគាំទ្រទៅលើការធ្វើវិសោធនកម្មច្បាប់ ព្រោះសកម្មភាពទាំងនេះបង្ហាញថា ពួកគេមានបំណងចង់បំពានទៅលើរដ្ឋធម្មនុញ្ញឆ្នាំ២០០៧ របស់ព្រះរាជាណាចក្រថៃ។

យ៉ាងនេះក្តីកាលបរិច្ឆេទ សម្រាប់សភាថៃ បោះឆ្នោតចោទប្រកាន់ ទៅលើរឿងក្តីនេះ មិនទាន់កំណត់ច្បាស់នៅឡើយទេ។

ដោយឡែកលោក Amnuay Klangpa សមាជិកម្នាក់របស់បក្សភឿថៃ បានបញ្ជាក់ថា សមាជិកចំនួន១៦០នាក់ បានសម្តែងការប្រឆាំងយ៉ាងខ្លាំង បន្ទាប់ការសម្រេចរបស់ គណៈកម្មាធិការប្រឆាំងអំពើពុករលួយ ។ លោកជឿជាក់ថា ពួកគេមិនអាច ចោទប្រកាន់ក្រុមរបស់លោកបានឡើយ ដោយជាធម្មតា សមាជិកសភា មានសិទ្ធិក្នុងការធ្វើ កំណែទម្រង់រដ្ឋធម្មនុញ្ញ ហើយគ្រប់ដំណើរការនៃការកែប្រែ គឺស្របតាមផ្លូវច្បាប់ទាំងអស់៕