រដ្ឋមន្ត្រីក្រសួងពាណិជ្ជកម្មជឿជាក់ថាកម្ពុជានឹងចំណេញពេលសមាហរណកម្មអាស៊ានមកដល់
សារព័ត៌មាន Cambodia News /
អត្ថបទ៖ ហេង នាង/
ភ្នំពេញ (១៦ កុម្ភៈ ២០១៥)៖ នៅក្នុងសន្និបាត អនុសញ្ញាអតីតនិស្សិតសកល (Global Alumni Convention) កាលពីព្រឹកថ្ងៃទី១៥ខែកុម្ភៈឆ្នាំ២០១៥ នៅសណ្ឋាគារសូហ្វីតែល លោក ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងពាណិជ្ជកម្មបានឲ្យដឹងថា នៅពេលកម្ពុជាចូលក្នុងសមាហរណកម្មសេដ្ឋកិច្ចអាស៊ាន ដែលជាទីផ្សារមួយ តំបន់ផលិតមួយ ទំនិញហូរចេញហូរចូលស្រួល កម្ពុជានឹងចំណេញ នៅពេលចូលជាសមាជិកអាស៊ាន។
លោកទេសរដ្ឋមន្ត្រី ស៊ុន ចាន់ថុលបន្តថា យើងត្រូវបណ្តុះបណ្តាលធនធានមនុស្ស ផ្នែកបច្ចេកទេសឲ្យបានច្រើន ហើយនៅថ្ងៃចាប់ផ្តើមសហគមន៍អាស៊ាន យើងត្រូវតែអូសទាញអ្នកវិនិយោគ ឲ្យមកដាក់ទុននៅកម្ពុជា ដើម្បីបង្កើតការងារឲ្យបានប្រាក់កម្រៃខ្ពស់ជាងការងារ ដែលមានសព្វថ្ងៃ នឹងធ្វើឲ្យប្រាក់បៀវត្សបានច្រើន។
សម្រាប់ធនធានមនុស្ស កម្ពុជាវិញ មាននិស្សិតមិនតិចទេ ដែលកំពុង និងបានបញ្ចប់ការសិក្សា តាមសាកលវិទ្យាល័យ នៅទូទាំងប្រទេស ប៉ុន្តែក្រុមនិស្សិតទាំងនោះហាក់ដូចជា មិនមានជំនឿចិត្តលើខ្លួនឯង ដែលនេះអាចជាបញ្ហាប្រឈមមួយ ដែលកម្ពុជាកំពុងតែព្រួយបារម្ភ ដោយសារថា សហគមន៍អាស៊ានរួមនឹងត្រូវបង្កើតឡើងនៅចុងឆ្នាំ២០១៥នេះ។
គួរបញ្ជាក់ថា នៅចុងឆ្នាំ២០១៥ខាងមុខនេះ សហគមន៍អាស៊ានរួមនឹងត្រូវបង្កើតឡើងការបង្កើតសហគមន៍អាស៊ានរួមនេះ នឹងធ្វើឲ្យ ការចរាចរណ៍ទំនិញ ដោយគ្មានពន្ធគយនិង លំហូរចូលនៃប្រជាជននៅបណ្តាប្រទេសអាស៊ាន ធ្វើដំណើរពីប្រទេសមួយទៅកាន់ប្រទេសមួយទៀត គឺគ្មានទិដ្ឋាការឡើយ និយាយពីកម្ពុជាវិញ កម្ពុជា គឺជាសមាជិកអាស៊ានចុងក្រោយគេ ដែលបាន សម្រេចចិត្តចូលជាសមាជិក អាស៊ាននៅឆ្នាំ១៩៩៩៕
