វិស័យសំណង់ រើកចំរើនខ្លាំង នៅរាជធានីភ្នំពេញ រយៈពេល១០ឆ្នាំងចុងក្រោយ
សារព័ត៌មាន Cambodia News/
ភ្នំពេញ (០៤ ធ្នូរ ២០១៤) ៖ ថ្លែងនៅក្នុងពិធីបើកមហាសន្និបាត បូកសរុបការងារលើកទី៣ និងសម្ភោធបើកការ តាំងពិព័រណ៍ ឧស្សាហកម្មសំណង់កម្ពុជា នៅកោះពេជ្រ នៅ ព្រឹកថ្ងៃទី៣ ធ្នូ ឆ្នាំ២០១៤ លោក ប៉ា សុជាតិវង្ស អភិបាលនៃគណៈ អភិបាលរាជធានីភ្នំពេញ បានមានប្រសាសន៍ថា រយៈពេល ១០ឆ្នាំចុងក្រោយនេះ វិស័យសំណង់ ក្នុងរាជធានីភ្នំពេញ មានការរីកចម្រើនយ៉ាងខ្លាំង។
លោកប៉ា សុជាតិវង្ស បន្តថា បច្ចុប្បន្ន រាជធានីភ្នំពេញ មានផ្ទៃដីសរុប ៦៧៨គីឡូម៉ែត្រការ៉េ ចែកចេញជា ១២ខណ្ឌ និង៩៦សង្កាត់ មានប្រជាជនរស់នៅ អចិន្ត្រៃយ៍ប្រមាណជា ១,៦លាននាក់ និងមានប្រជាជនស្នាក់នៅ បំរើការងារប្រមាណ ០៨សែននាក់ ក្នុងនោះអត្រា កំណើត ៣,១៥% ក្នុងមួយឆ្នាំ និងមានដង់ស៊ីតេ ប្រមាណ ២២៨៧នាក់ក្នុង ១គីឡូម៉ែត្រការ៉េ ។
នៅក្នុងរយៈពេល ១០ឆ្នាំចុងក្រោយនេះ វិស័យសំណង់ក្នុង រាជធានីភ្នំពេញ មានការរីកចម្រើន យ៉ាងខ្លាំង ដូចជាទីក្រុងរណប អាគារពាណិជ្ជកម្ម សំណង់បុរី និងខុនដូ ត្រូវបានសាងសងឡើង ជាបន្តបន្ទាប់ដែលជារួម មានអាគារខ្ពស់ចំនួន ៣៨៧អាគរ ក្នុងនោះ មានអគារកម្ពស់ពី០៥ទៅ ០៩ជាន់មានចំនួន ៣១០អគារ, អគារកម្ពស់ពី១០ទៅ ១៩ជាន់មានចំនួន ៦៧អគារ ,អគារកម្ពស់ពី ២០ទៅ២៩ ជាន់មានចំនួន ៣អគារ , អគារកម្ពស់ពី ៣០ទៅ៣៩ជាន់ មានចំនួន ៥អគារ និង អគារ៤០ជាន់ មានចំនួន ១អគារ ។
ក្រៅពីនេះក៏មាន សំណង់បុរីមានចំនួន ៧៤កន្លែង ហើយនៅក្នុងឆ្នាំ ២០១៤នេះ រាជធានីភ្នំពេញ មានគម្រោងសាងសង់ចំនួន ៣៧៦គម្រោង លើផ្ទៃដីសរុប៣.៣៨៧.៧៦៣ ម៉ែត្រក្រឡាក្នុងទំហំ វិនិយោគជាងមួយពាន់ លានដុល្លារ៕
