ក្រសួងអប់រំមិនផ្តល់អាហារូបករណ៍ សម្រាប់សិស្សប្រឡងជាប់បាក់ឌុបលើកទី២
សារព័ត៌មាន Cambodia News/
ភ្នំពេញ (១៧ តុលា ២០១៤) ៖ រដ្ឋមន្ត្រីក្រសួងអប់រំយុវជន និងកីឡាបញ្ជាក់ថា ក្រសួងមិនមានអាហារូបករណ៍សម្រាប់សិស្សដែលប្រឡងជាប់បាក់ឌុបលើកទី២ កាលពីថ្ងៃទី១៣ និង១៤ ខែតុលានោះទេ។
លោក ហង់ ជួន ណារ៉ុន រដ្ឋមន្ត្រីក្រសួងអប់រំបានផ្តល់បទសំភាសន៍ឲ្យអ្នកសារព័ត៌មាន បន្ទាប់ពីកិច្ចប្រជុំជាមួយប្រធានមណ្ឌលប្រឡង មន្ត្រីអង្គភាពប្រឆាំងអំពើពុករលួយ និងអ្នកអង្កេតការណ៍ប្រមាណ២០០នាក់ កាលពីរសៀលថ្ងៃទី១៥ ខែតុលា ដើម្បីពិនិត្យមើលដំណើរការប្រឡងលើកទី២ថា សិស្សដែលប្រឡងជាប់លោកទី២នេះ គ្រប់និទ្ទេសទាំងអស់នឹងមិនទទួលបានអាហារូបករណ៍ពីសាលារដ្ឋនោះទេ តែពួកគេអាចមានឱកាសទទួលបានអាហារូបករណ៍ពីសាលាឯកជន។
លោក ហង់ ជួន ណារ៉ុន បន្ថែមថាការប្រឡងលើកទី២នេះ មានលក្ខណៈប្រសើរជាងលើកទី១ទៅទៀត។ លោកថាក្រោយដំណើរការប្រឡង ភាពអវិជ្ជមានទូទៅបានកើតឡើងតិចជាងលើកទី១ តែចំនួនបេក្ខជនបានអវត្តមានច្រើនរហូតជាង ៦៧០០នាក់ ដែលលើកទីមួយមានតែជាង១០០០នាក់ប៉ុណ្ណោះ។ លោកបញ្ជាក់ទៀតថា នៅឆ្នាំក្រោយមិនមានរៀបចំការប្រឡងលើកទី២ ដូចឆ្នាំនេះទៀតទេ។
ក្នុងសម័យប្រឡងសញ្ញាបត្រមធ្យមសិក្សាទុតិយភូមិលើកទី២ ថ្ងៃទី១៣-១៤ ខែតុលា ឆ្នាំ២០១៤នេះ មានមណ្ឌលប្រឡងទូទាំងប្រទេសចំនួន១១៧ ត្រូវជា២៧៥២បន្ទប់ និងមានបេក្ខជនប្រឡងជាង ៦០ ០០០នាក់៕
