ឥណ្ឌាបើកភោជនីដ្ឋានសម្រាប់ផ្តល់ឱកាសការងារដល់អ្នកទោស
សារព័ត៌មាន Cambodia News/
ឥណ្ឌា (១៩ សីហា ២០១៤) ៖ ស្ថិតនៅចម្ងាយមិនដល់១គីឡូម៉ែត្រពី សន្តេវាសិកដ្ឋានពន្ធនាគារ Tihar ស្ថិតនៅភាគខាងលិចទីក្រុង New Delihi ប្រទេសឥណ្ឌា គេប្រទះឃើញភោជនីដ្ឋានដ៏សាមញ្ញមួយ។ ប៉ុន្តែអ្វីដែលចំលែកនោះភោជនីដ្ឋាននេះ មានបុគ្គលិកបំរើការសុទ្ធតែជាអ្នកទោស កំពុងជាប់នៅក្នុងពន្ធនាគារ Tihar ដែលជាពន្ធនាគារធំជាងគេនៅអាស៊ីអាគ្នេយិ៍ខាងត្បូង។
បើតាមលោក ស៊ូនីល ហ្គូតា (Sunil Gupta) ជាអ្នកនាំពាក្យសម្រាប់ពន្ធនាគារ Tihar បានបញ្ជាក់ថា ទណ្ឌិតដែលអាចក្លាយជាបុគ្គលិកនៅក្នុងភោជនីដ្ឋានមួយនេះបាន លុះត្រាតែបំពេញបាននូវលក្ខខណ្ឌមួយចំនួន ដូចជាទណ្ឌិតនោះត្រូវ មានកម្រិតសិក្សាយ៉ាងទាបណាស់ត្រឹមថ្នាក់វិទ្យាល័យ។ ទីពីរមិនប្រឡូកប្រឡាកអំពើមិនល្អណាមួយ នៅក្នុងអំឡុងពេលដែលពួកគេស្ថិតនៅក្នុងពន្ធនាគារ ទីបីទណ្ឌិតនោះត្រូវ នៅសល់រយៈពេលពីរឆ្នាំប៉ុណ្ណោះនៃការអនុវត្តទោស។
អ្នកនាំពាក្យសម្រាប់ពន្ធនាគារ Tihar រូបនោះបានឲ្យដឹងថា នេះគឺជាកំណែទម្រង់មួយ អាចជួយដល់អ្នកជាប់ពន្ធនាគារ ឬស្ថាប័នកែប្រែ Tihar ដែលមានទណ្ឌិតរាប់ពាន់នាក់ស្ថិតនៅ ដើម្បីដាក់បញ្ចូលពួកគេ ឲ្យស្គាល់សង្គមដែលមានការវិវត្តទៅមុខឥតឈប់ឈ។ ជួយឲ្យពួកគេរកប្រាក់កំរ៉ៃ និងបង្តើនចំណេះជំនាញដល់ទណ្ឌិត ពេលដែលពួកគេមានឱកាសចេញពីពន្ធនាគារ។
សូមបញ្ជាក់ថា ពន្ធនាគារ Tihar ត្រូវបានគេហៅថាជា ស្ថាប័នកែប្រែដែលធំជាងគេនៅអាស៊ីខាងត្បូង មានទណ្ឌិតជាង១ម៉ឺននាក់ស្ថិតនៅ។ ទណ្ឌិតទាំងនោះ បានទទួលនូវការបង្រៀនវគ្គបណ្តុះបណ្តាលជាច្រើនដូចជា ការបណ្តុះបណ្តាលពីវិធីសាស្ត្រព្យាបាលតាមការប្រគុំតន្ត្រី មានស្ថានីយិ៍វិទ្យុផ្ទាល់ខ្លួន មានបុគ្គលិកជាទណ្ឌិត មានការបង្រៀនវគ្គបណ្តុះបណ្តាលទាក់ទងទៅនិង វិស័យឧស្សាហកម្ម និងផ្សេងៗទៀត៕
