ស្ត្រីម្នាក់ ត្រូវជនមិនស្គាល់មុខបាញ់សម្លាប់ជាច្រើនគ្រាប់
សារព័ត៌មាន Cambodia News/
ភ្នំពេញ (០៦ សីហា ២០១៤) ៖ ស្ត្រីវ័យ៣៦ឆ្នាំម្នាក់ត្រូវបានជនមិនស្គាល់មុខមានគ្នា២នាក់បានបាញ់ប្រហារជាច្រើនគ្រាប់ បណ្ដាលឲ្យស្លាប់ភ្លាមៗនៅកន្លែងកើតហេតុ ស្ថិតនៅបណ្ដោយផ្លូវច្រកចូលវត្តអង្គតាម៉ិញ សង្កាត់តាកាប ខណ្ឌពោធិ៍សែនជ័យ រាជធានីភ្នំពេញ។
ករណីនេះកើតឡើងកាលពីថ្ងៃទី០៦ ខែសីហា ឆ្នាំ២០១៤ វេលាម៉ោង ៩:០០នាទីព្រឹក ជនរងគ្រោះមានឈ្មោះ គឹម សុជាតា អាយុ ៣៦ឆ្នាំ ត្រូវជនសង្ស័យបាញ់ជាច្រើនគ្រាប់បណ្ដាលឲ្យស្លាប់ភ្លាមៗ។
តាមប្រភពពីសមត្ថកិច្ចបានឲ្យដឹងថា ដោយមុនពេលកើតហេតុនារីរងគ្រោះនិងម្ដាយបានជិះម៉ូតូ Icon ចេញពីផ្ទះក្នុងបំណងទៅលេងផ្ទះបងប្អូននៅផ្លូវវេងស្រេង ស្រាប់តែមកដល់កន្លែងកើតហេតុ ក៏មានជនមិនស្គាល់មុខមានគ្នា២នាក់ជិះម៉ូតូម៉ាកឌ្រីមសង់ បានបាញ់ជាច្រើនគ្រាប់ចំក្បាលស្លាប់តែម្ដង ហើយសមត្ថកិច្ចបានកំណត់អត្តសញ្ញាណជនសង្ស័យរួចហើយ តែមិនទាន់តាមចាប់បាន។
ចំពោះករណីបាញ់សម្លាប់ដ៏ព្រៃផ្សៃនេះសមត្ថកិច្ចសង្ស័យថាជារឿងគំនុំ ប៉ុន្តែប្រជាជននៅជិតដាក់សង្ស័យជារឿងត្រីកោណ៕
