ក្រុមប្រឹក្សាយោធាថៃ ពន្យារពេលការបោះឆ្នោតថ្នាក់មូលដ្ឋាន
សារព័ត៌មាន Cambodia News/
ថៃ (១៧ កក្កដា ២០១៤) ៖ ក្រុមប្រឹក្សាសន្ដិភាព និងសណ្ដាប់ធ្នាប់នៃប្រទេសថៃ ប្រកាសពន្យារពេលការបោះឆ្នោតថ្នាក់មូលដ្ឋាន គឺរហូតទាល់តែមានការធ្វើសេចក្ដីសម្រេចថ្មីឡើងវិញ ខណៈស្ថានការណ៍ នយោបាយ មិនទាន់ល្អប្រសើរ។
តាមគម្រោងប្រទេសថៃរៀបចំការបោះឆ្នោតថ្នាក់មូលដ្ឋាននៅចុងឆ្នាំ២០១៤ នេះ។ ក្រុមប្រឹក្សាសន្ដិភាពនិងសណ្ដាប់ធ្នាប់ប្រទេសថៃ ប្រកាសថា ការបោះឆ្នោតនេះតម្រូវឲ្យមានការអនុម័តយល់ព្រមពីសមាជិកក្រុមប្រឹក្សា យោធាយ៉ាងតិច២ភាគ៣ ប៉ុន្ដែក្រុមប្រឹក្សានេះមិនអាចរកសំឡេងគ្រប់គ្រាន់បានឡើយ។
ក្រុមប្រឹក្សាបានប្រកាសថា ខ្លួននឹងធ្វើសេចក្ដីសម្រេចឲ្យមានការបោះឆ្នោតមូលដ្ឋានជាថ្មីឡើងវិញ នៅពេលដែលខ្លួនគ្រប់គ្រងស្ថានការណ៍បានល្អប្រសើរហើយរៀបចំច្បាប់ បោះឆ្នោតថ្មីឡើងវិញ។
បើទោះជាយ៉ាងនេះក្ដី ក្រុមប្រឹក្សាសន្ដិភាពនិងសណ្ដាប់ធ្នាប់របស់ពួកយោធា ប្រកាសថា ការបោះឆ្នោតសភាអាចដំណើរការបាននៅខែតុលា ឆ្នាំ២០១៥។
មកដល់ពេលនេះ ក្រុមប្រឹក្សាប្រកាសថា ខ្លួននឹងរៀបចំរដ្ឋធម្មនុញ្ញ និងរដ្ឋាភិបាលបណ្ដោះអាសន្ននៅខែកញ្ញាខាងមុខនេះ ដើម្បីត្រួសត្រាយផ្លូវឲ្យមានការបោះឆ្នោតសភាជាតិទៅតាមគោ
លការណ៍ ប្រជាធិបតេយ្យសេរីពហុបក្ស។ សូមជម្រាបថាការបោះឆ្នោតមូលដ្ឋាន រួមមានការបោះឆ្នោតក្រុមប្រឹក្សារដ្ឋធានីក្រុងបាងកកផងដែរ៕
