រដ្ឋាភិបាលយោធាថៃ ផ្តល់ប័ណ្ណធានាសុខភាពដល់ពលករ
សារព័ត៌មាន Cambodia News/
ថៃ (០១ កក្កដា ២០១៤) ៖ កាសែតបាងកកប៉ុស្តិ៍ថៃ បានចុះផ្សាយថា រដ្ឋាភិបាលយោធាថៃ ឲ្យដឹងថាពលករមកពីប្រទេសកម្ពុជា មីយ៉ាន់ម៉ា និងឡាវ អាចទិញប័ណ្ណធានាសុខភាពបានសម្រាប់ការស្នាក់នៅធ្វើការក្នុងប្រទេសថៃ។
តម្លៃនៃប័ណ្ណធានាសុខភាពនេះ មានពីរ គឺតម្លៃ៥០០បាត សម្រាប់ការធានាសុខភាពរយៈពេល៣ខែ និង៩០០បាត សម្រាប់រយៈពេល៦ខែ។សមាជិកគ្រួសាររបស់ពលករ អាចទិញប័ណ្ណបាន ហើយការពិនិត្យសុខភាពត្រូវបានទទួលខុសត្រូវដោយប្រព័ន្ធធានាសុខភាពរបស់ថៃ។
គួបញ្ជាក់ថា ក្រោយពីរដ្ឋប្រហារយោធានៅប្រទេសថៃកាលពីថ្ងៃទី២២ខែឧសភា រដ្ឋាភិបាលយោធាថៃបានបញ្ជូនពលករខ្មែរជាច្រើនម៉ឺននាក់ទាំងនាក់ ទាំងមិនស្របច្បាប់ និងស្របច្បាប់មកកម្ពុជាវិញ។
យោងតាមរបាយការណ៍ក្រសួងមហាផ្ទៃកម្ពុជាឲ្យដឹងថា គិតពីថ្ងៃទី០៦ ដល់២២ខែមិថុនា ពលករខ្មែរជាង២២ម៉ឺននាក់ត្រូវបានរដ្ឋាភិបាលយោធាថៃបញ្ជូនមកកម្ពុជាវិញ ក្នុងនោះមានអ្នកស្លាប់៨នាក់ និងរបួស១៦នាក់ក្នុងគ្រោះថ្នាក់ចរាចរណ៍នៅប្រទេសថៃ៕
