ទឹកនឹងឡើងខ្លាំងអំឡុងពេល៤ទៅ៦ថ្ងៃខាងមុខ
សារព័ត៌មាន Cambodia News/ ភ្នំពេញ (២៥ មិថុនា ២០១៤) ៖ ឥទ្ធិពលរបស់ជ្រលង សម្ពាធទាប នឹងបង្ករឲ្យមាន ភ្លៀងធ្លាក់ច្រើនជាបន្តបន្ទាប់ នៅក្នុងព្រះរាជាណាចក្រកម្ពុជា ជាពិសេសនៅអាងទន្លេមេគង្គ ក្នុងប្រទេសថៃ និងឡា។ ស្ថានភាពបែបនេះ នឹងបណ្តាលឲ្យកំពស់ទឹកទន្លេមេគង្គ ទន្លេបាសាក់ ទន្លេសាប និងកំពស់ទឹកបឹងទន្លេសាប ចាប់ផ្តើម ហក់ឡើង ជាបន្ទាន់ ក្នុអំឡុងពេល ពី ៤ ទៅ ៦ថ្ងៃខាងមុខ។ នេះបើតាមសេចក្តី ជូនដំណឹង របស់ ក្រសួងធនធានទឹក និងឧតុនិយម នៅថ្ងៃទី ២៤ ខែមិថុនានេះ។ សេចក្តីជូនដំណឹងដដែល បានបន្តថា ទឹកអាចនឹងហូរចូលទៅតំបន់ ទំនាបមួយ ចំនួន ដែលស្ថិតនៅតាមដងទន្លេ ធ្វើឲ្យលិច និងប៉ះពាល់ដល់ដំណាំកសិផលរបស់ ប្រជាពលរដ្ឋនៅតំបន់ទាំងនោះ។ ក្រសួងធនធានទឹក និងឧតុនិយម ក៏បានអំពាវនាវ ដល់ អាជ្ញាធរដែនដី និងប្រជាពលរដ្ឋ ដែលរស់នៅ តាមដងទន្លេមេគង្គ ទន្លេសាប ទន្លេបាសាក់ រួសរាន់ មានវិធានការប្រមូលកសិផល ឲ្យទាន់ពេលវេលា។
ម្យ៉ាងវិញទៀត បើទោះជាកំពស់ទឹក នៅពេលនេះ មិនទាន់កើនឡើង ខ្លាំងខ្ពស់ក្តី ប៉ុន្តែចរន្តទឹក និងល្បឿន របស់ ទឹក ទន្លេនៅពេលនេះ មិនទាន់កើនឡើង ខ្ពស់ខ្លាំងក្តី ប៉ុន្តែចរន្ត និងល្បឿនរបស់ទឹក ចាប់ផ្តើមប្រែប្រួល។ ដូចនេះ សូមសាធារណជន និងអ្នកធ្វើដំណើរតាមដងទន្លេ បង្កើនការយកចិត្តទុកដាក់ ប្រុងប្រយ័ត្ន ដើម្បីចៀសវាងនូវគ្រោះថ្នាក់ ផ្សេងៗ ដែលអាចកើតមាន ឡើង ជាយថាហេតុ៕ 