យុវជន ៣នាក់ ស្លាប់បាត់បង់ជីវិត ក្នុងករណីគ្រោះថ្នាក់ចរាចរ
សារព័ត៌មាន Cambodia News/
កណ្តាល (១៥ ឧសភា ២០១៤) ៖ កាលពីវេលាម៉ោង ៦ និង ១០ល្ងាចថ្ងៃទី១៤ ខែឧសភា ឆ្នាំ២០១៤ យុវជន ៣នាក់បានបាត់បង់ជីវិតដោយសារតែការបើកបរម៉ូតូក្នុងល្បឿនលឿនហើយទៅបុក ម៉ូតូម្ខាងទៀត នៅចន្លោះស្ពានលេខ៥៣ និងលេខ៥៤ ក្នុងភូមិព្រែកធន់ ឃុំព្រែកថ្មី ស្រុកកោះធំ ខេត្តកណ្តាល។
បើតាមន្រ្តីនគរបាល នៃស្នងការដ្ឋាននគរបាលខេត្តកណ្តាល បានឲ្យដឹងថា គ្រោះថ្នាក់ចរាចរបានកើតឡើង ជនរងគ្រោះក្នុងឧប្បត្តិហេតុគ្រោះថ្នាក់ចរាចរណ៍នេះ គឺម្ខាងកំពុងធ្វើដំណើរក្នុង ទិសដៅពីជ្រៃធំ ឆ្ពោះមកក្រុងតាខ្មៅ និងម្ខាងទៀតធ្វើទិសដៅពីក្រុងតាខ្មៅឆ្ពោះទៅជ្រៃធំ។
សមត្ថកិច្ចបន្តទៀតថា ភាគីម្ខាងជិះម៉ូតូឌ្រីម C125 ពណ៌ខ្មៅ ស៊េរីឆ្នាំ ២០១៤ គ្មានស្លាកលេខ ជិះគ្នា ០២នាក់។ ១-ឈ្មោះ ខន នឿន ភេទប្រុស អាយុ ២៥ឆ្នាំ មានលំនៅឋានក្នុងភូមិព្រែកម្រិញ ឃុំពោធិ៍បានជាម្ចាស់ម៉ូតូ និងទី ២- ឈ្មោះ ខេន ខន ភេទប្រុស អាយុ ២៦ឆ្នាំ មានលំនៅដ្ឋានក្នុងភូមិព្រែកតាគង់ ឃុំសំពៅពូន ជាអ្នកបើកម៉ូតូ។
រីឯម្ខាងទៀតជិះម៉ូតូឌ្រីម C125 ដូចគ្នា តែស៊េរីឆ្នាំ ២០១១ ពណ៌ខ្មៅ ពាក់ស្លាកលេខ រតនគីរី1A. 7658។ ជនរង គ្រោះទី៣ មានឈ្មោះ ហ៊ូ ស៊ីថា ភេទប្រុស អាយុ ២០ឆ្នាំ មានលំនៅឋានក្នុងភូមិស្វាយកណ្តាល ឃុំព្រែកថ្មី។
ក្រោយពេលកើតហេតុសមត្ថកិច្ច បានចុះទៅវាស់វែងនៅកន្លែងកើតហេតុ និងយកម៉ូតូទៅរក្សាទុករង់ចាំដោះ ស្រាយជាក្រោយ។ រីឯសពយុវជនទាំង៣នាក់ ត្រូវបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី៕
