រដូវវស្សាឆ្នាំនេះ មានភ្លៀងធ្លាក់រាយប៉ាយទាបជាងឆ្នាំមុន
សារព័ត៌មាន Cambodia News/
ភ្នំពេញ (២៣ មេសា ២០១៤) ៖ ក្រសួងធនធានទឹក និងឧតុនិយម ឲ្យដឹងថា នៅក្នុងរដូវវស្សាឆ្នាំ២០១៤ ដែលចាប់ពីពាក់កណ្ដាលខែឧសភា ដល់មិថុនា ខាងមុខនេះ ស្ថានភាពទឹកភ្លៀងនឹងមានធ្លាក់រាយប៉ាយក្នុងកម្រិតមធ្យម ទាបជាងឆ្នាំមុន ហើយក្នុងអំឡុងពេលនោះ ក៏នឹងមានបាតុភូត ផ្គរ រន្ទះ និងខ្យល់កន្ត្រាក់ កើតឡើងច្រើនដងដែរ។
សេចក្ដីជូនដំណឹងពីស្ថានភាពអាកាសធាតុ នារដូវវស្សាឆ្នាំ២០១៤ នេះ របស់ក្រសួងធនធានទឹក និងឧតុនិយម ចេញផ្សាយនៅថ្ងៃទី២២ ខែមេសានេះ ឲ្យដឹងថា នៅចុងរដូវប្រាំងនេះ ទឹកភ្លៀងនឹងបន្តធ្លាក់រាយប៉ាយទូទាំងប្រទេស ហើយនឹងបញ្ចប់នៅសប្តាហ៍ទី២ នៃខែឧសភា ហើយរដូវវស្សា នឹងចាប់ផ្តើមនៅក្នុងសប្តាហ៍ទី៣ នៅតំបន់មាត់សមុទ្រ និងតំបន់វាលទំនាប ចំនែកឯតំបន់ខ្ពង់រាប រដូវវស្សានឹងចាប់ផ្តើមនៅក្នុងសប្តាហ៍ទី៤ នៃខែនេះដដែល។
សេចក្តីជូនដំណឹង ដដែលបន្តថា ការវិភាគប្រៀបធៀបទឹកភ្លៀងរវាងឆ្នាំ២០១៤ ទៅនឹងមធ្យមភាគច្រើនឆ្នាំ បានបង្ហាញថា កម្រិតនឹងរបាយទឹកភ្លៀង មាននិន្នាការកើនឡើង ជាពិសេស នៅពាក់កណ្ដាលរដូវរហូតដល់ចុងរដូវវស្សា ហើយចាប់ពីខែកក្កដា ដល់ខែវិច្ឆិកា បរិមាណទឹកភ្លៀងនឹងធ្លាក់រាយប៉ាយពីបង្គួរទៅច្រើន ហើយកម្រិតទឹកភ្លៀងអាចនឹងធ្លាក់ចុះច្រើនជាងឆ្នាំមុន ដែលអាចប្រហាក់ប្រហែលនឹងឆ្នាំ២០១១ ។ រដូវវស្សាឆ្នាំ២០១៤នេះ នឹងត្រូវបញ្ចប់នៅសប្ដាហ៍ទី៣ ខែវិច្ចិកា។
សេចក្តីជូនដំណឹងរបស់ ក្រសួងធនធានទឹក បន្តទៀតថា ក្នុងឆ្នាំនេះ នៅសមុទ្រប៉ាស៊ីហ្វិកអាចកើតមានព្យុះពី ២៤-២៦ដង ហើយព្យុះដែលរំកិលចូលមកក្នុងសមុទ្រចិនខាងត្បូង អាចនឹងមានចំនួនច្រើនជាងឆ្នាំ២០១៣៕
